މާލެސިޓި ނެގުމަށްފަހު ރާއްޖޭގެ އެންމެ އާބާދީ ބޮޑު އެއް އަތޮޅު ކަމަށްވާ އައްޑޫސިޓީ ކައުންސިލްގެ ޖަލްސާތައް ފުރަތަމަ ފަހަރަށް ލައިވް ކުރުމަށް ނިންމައިފިއެވެ.
އައްޑޫސިޓީ ކައުންސިލުން ބުނީ، އެކައުންސިލްގެ މިއަހަރުގެ ހަތްވަނަ ޖަލްސާ މާދަމާ ހެނދުނު 11 ޖަހާއިރު އޮންނާނެ ކަމަށެވެ. އަދި އެޖަލްސާ ލައިވްކުރާ ގޮތަށް ހަމަޖެހިފައިވާ ކަމަށެވެ. ލައިވް ކުރަން ނިންމި ސަބަބެއް ހާމައެއް ނުކުރެއެވެ.
މާދަމާގެ ޖަލްސާގައި އެ ކައުންސިލުން ވަނީ ގިނަ ކަންތައްތަކެއް އެޖެންޑާކޮށްފައެވެ. އެގޮތުން މާދަމާގެ ޖަލްސާގައި ކުއްލި މައްސަލައެއް ހުށަހަޅާއިރު އެ މައްސަލައަށް ބަހުސް ކުރުމާއި ދައުލަތުގެ މުއައްސަސާތަކުން ހުށަހަޅާ މައްސަލަތައްވެސް ހިމެނއެވެ. އޭގެތެރޭގައި އައްޑޫސިޓީން ދޫކުރެވިފައިވާ ފްލެޓްތަކުގެ އަސާސީ ޚިދުމަތްތައް ޤާއިމު ކުރުމުގައި ލަސްތަކެއް ދިމާވުމުން ފްލެޓް ތަކުގެ މަހު ފީ ނެގުން ފަސް ކުރުމާއި މެދު ގޮތެއް ނިންމުމަށް މިނިސްޓްރީ އޮފް ހައުސިންގް އެންޑް އާބަން ޑިވެލޮޕްމަންޓް އިން ހުށަހަޅާ މައްސަލަ ބަހުސްކުރުން ހިމެނެއެވެ.
އަދި ޕްލޭނިން ސެކްޝަންގެ ދަށުން އައްޑޫ ސިޓީ ހުޅުދޫ އަވަށުން ދޫކުރެވިފައިވާ ފްލެޓްތަކަށް އެކަށީގެންވާ ޢަދަދަށް މީހުން ކުރިމަތިލާފައި ނުވުމުން ފްލެޓް ތައް ދޫކުރުމުގައި ޢަމަލު ކުރާނެ ގޮތެއް ނިންމުމަށް މިނިސްޓްރީ އޮފް ހައުސިން އެންޑް އާބަން ޑިވެލޮޕްމަންޓް އިން ހުށަހަޅާ މައްސަލައަށް ބަހުސް ކުރުން ހިމެނެއެވެ. މީގެއިތުރުންވެސް ރައްޔިތުންގެ ފަރާތުން ހުށަހަޅާ މައްސަލަތަކާއި އަވަށު އޮފީސްތަކުން ހުށަހަޅާ މައްސަލައިގެ އިތުރުން، އަންހެނުންގެ ތަރައްޤީއަށް މަސައްކަތްކުރާ ކޮމިޓީ ދާއިމީ ކޮމިޓީގެ އަވަށު ބޯޑުތަކުން ހުށަހަޅާ މައްސަލަތަކަށްވެސް ބަހުސް ކުރުން މާދަމާގެ ޖަލްސާގައި ވަނީ އެޖެންޑާކޮށްފައެވެ.
އައްޑޫ ސިޓީ ކައުންސިލްގެ ބައްދަލުވުންތައް ލައިވް ކުރަން ނިންމިއިރު މާލެސިޓީ ކައުންސިލްގެ ބައްދަލުވުންތައް މިހާރުވެސް އަންނަނީ ލައިވް ކުރަމުންނެވެ. ނަމަވެސް އެކައުންސިލްގެ ބައްދަލުވުންތައް ލައިވް ކުރަން ފަށާފައި މިވަނީ ވަރަށް ފަހުންނެވެ.