ހުރިހާ ސަރުކާރަކުންވެސް އައްޑޫ ރައްޔިތުން ބޭނުން ކުރަނީ ސިޔާސީ ހަތިޔާރެއްގެ ގޮތުގައި ކަމަށާއި އެގޮތަށް ސިޔާސީ ފަރާތްތަކަށް ފުރުސަތު ނުދިނުމަށް ޖުމްހޫރީ ޕާޓީގެ ޑެޕިޔުޓީ ލީޑަރު ޑރ. އިބްރާހީމްދީދީ (ޑރ. ޑީޑީ) އެދިވަޑައިގެންފި އެވެ.
ޖުމްހުރީ ޕާޓީގެ ރަނިންމޭޓް ޑރ. ހަސަން ސައީދު އާއި ކެންޑިޑެޓް ގާސިމް އިބްރާހިމް މާލޭގައި ތިބި އައްޑޫގެ ރައްޔިތުންނާ ބައްދަލުކޮށް ލެއްވުމަށް މ. ކުނޫޒްގައި ބޭއްވި ތަރާވީޙް ފަރިއްކޮޅެއްގައި ވާހަކަ ދައްކަވަމުން ޑރ. ޑީޑީ ވިދާޅުވީ އައްޑޫ ސިޓީއަކީ މާލެ ފިޔަވައި އެންމެ ބޮޑު އާބަދީ އޮތް ސަރަހައްދު ކަމަށްވުމުން ކޮންމެ އިންތިޚާބަކާއި ގުޅުވައިގެންވެސް އައްޑޫ ސިޓީގެ ރައްޔިތުންނަކީ ސިޔާސީ ހަތިޔާރަކަށް ހަދަމުން އަންނަ ކަމަށެވެ.
ޑރ. ޑީޑީ ވިދާޅުވީ އިންތިހާބްތަކުގައި އައްޑު އަށް ކުރިއެރުން ހޯދައިދޭން ބުނި ނަމަވެސް އިންތިހާބަށް ފަހަށް އައްޑު އަށް އެއްވެސް ކުރިއެރުމެއް ހޯދައި ދީފައި ނުވާ ކަމަށެވެ.
ޑރ. އިބްރާހީމް ދީދީ ވިދާޅުވީ އައްޑޫގެ ރައްޔިތުންނަށް މިއަދުވެސް ތިބެންޖެހިފައި ވަނީ އެންމެ އަސާސީ ހައްޤުތައް ނުލިބި އެފަދަ ހައްޤުތަކުން މަހްރޫމްވެފައިކަމަށެވެ.
އައްޑޫ ސިޓީ ތަރައްޤީ ނުކުރެވި މިއަދާއި ހަމައަށް އޮތީ އެކަން ކުރުމުގެ ފުރުޞަތު ނުލިބޭތީ ނޫންކަމަށް ވިދާޅުވެ ޑރ. ޑީޑީ ވަނީ ކުރީގެ ސަރުކާރުތަކުން އައްޑޫގެ ތަރައްޤީއަށް ހުރަސް އަޅާކަމަށް ވިދާޅުވެ ފާޑު ކިޔާފަ އެވެ.
އަދި މައުމޫން ގަސްދުގައި އައްޑޫ ތަރައްޤީ ނުކުރީ ކަމަށް ވިދާޅުވެ އެ މަނިކުފާނަށް ވެސް ވަނީ ބަހުގެ ހަމަލާ ދެއްވާފަ އެވެ.
ޑރ. ޑީޑީ ވަނީ މާޒީއަށް ވިސްނައި ފިކުރުކޮށް އައްޑޫގެ ރައްޔިތުންނަށް ބޭނުންވާ ތަރައްޤީ ހޯދޭނެގޮތަށް މިފަހަރުގެ އިންތިޚާބުގައި ވޯޓު ދިނުމަށް ގޮވާލައްވާފަ އެވެ.