ކުރީގެ ރައީސް އަބްދުﷲ ޔާމީންގެ ސަރުކާރުގައި ހިނގާފައިވާ ކޮަރަޕްޝަންގެ މައްސަލަތައް ބަލައި ދައުލަތަށް ގެއްލިފައިވާ ފައިސާ ހޯދުމަށް ރައީސް އިބްރާހިމް މުހައްމަދު ސޯލިހް އުފެއްދެވި ރިޔާސީ ކޮމިޝަންގެ މެންބަރު ކަމުން އާސް އަބްދުﷲ އިސްތިއުފާ ދެއްވައިފިއެވެ.
އާސްގެ ފޭސްބުކްގައި ކޮށްފައިވާ ޕޯސްޓެއްގައި ވިދާޅުވީ ކޮރަޕްޝަން ކޮމިޝަނުން އޭނާ އިސްތިއުފާ ދެއްވާ ކަމުގެ ސިޓީ ރައީސް ސޯލިހަށް ފޮނުއްވާފައިވާ ކަމަށެވެ. އަދި އެފަދަ ކޮމިޝަނެއްގައި މަސައްކަތް ކުރުމުގެ ފުރުސަތު ރައީސް ސޯލިހު ދެއްވީތީ ޝުކުރު ދައްނަވާ ކަމަށްވެސް އާސް ވިދާޅުވިއެވެ. ނަމަވެސް އޭނާ އިސްތިއުފާ ދެއްވީ ކޮން ސަބަބަކާއި ހެދި ކަމެއް ހާމައެއް ނުކުރެއެވެ.
ކޮރަޕްޝަންގެ މައްސަލަތައް ބަލާ ކޮމިޝަނުން އާސް އިސްތިއުފާ ދެއްވުމުން މިހާރު އެ ކޮމިޝަނުގައި ތިއްބެވީ ކޮމިޝަންގެ ރައީސް އަހްމަދު އަސްހަދު އާއި ނަދީމް އިބްރާހީމާއި އައިޝަތު ހަނާ ވަހީދު އަދި ފާތިމަތު ސަރީރާ އަލީ ޝަރީފުއެވެ.