ކުރީގެ ރައީސް އަބްދުﷲ ޔާމީންގެ ވެރިކަމުގައި އެމަނިކުފާނުގެ ނައިބު ރައީސް އަހުމަދު އަދީބު ކުރެއްވި ގޯސްތަކުގެ ޒިންމާ ނަންގަވަން ޖެހޭނީ ހޯމް މިނިސްޓަރު އިމްރާން ކަމަށް ޔާމީން ވިދާޅުވެއްޖެއެވެ.
މިނިސްޓަރ އިމްރާން، މިދިޔަ ހޯމަ ދުވަހު ޖަލުގައި ރައީސް ޔާމީނަށް ކުރެއްވި ޒިޔާރަތާ ގުޅޭގޮތުން ވާހަކަ ދައްކަވަމުން އިމްރާން ވިދާޅުވީ، އަދީބު ކުރެއްވި ކަންކަމުން ލިބުނު ގެއްލުމުގެ ޒިންމާ ނަންގަވަން ޖެހޭނީ ޚުދު އިމްރާން ކަމަށް ޔާމީން ދެންނެވި ކަމަށެވެ.
ނަމަވެސް އެއްވެސް ގޮތަކަށް އެކަމުގެ ޒިންމާ އިމްރާން ނަގަން ޖެހޭ ސަބަބެއް ވިސްނިވަޑައިނުގަތް ކަމަށް ވެސް އެމަނިކުފާނު ވިދާޅުވިއެވެ. އަދީބަކީ ކޮންކަހަލަ މީހެއް ކަމަށް ރައީސް އޮފީހުގައި، ޔާމީނަށް ބުނެދެއްވި ކަމަށާއި އެވާހަކަ އަނެއްކާވެސް އެމަނިކުފާނަށް ހަނދާން އާ ކޮށްދެއްވި ކަމަށް ވެސް އިމްރާން ވިދާޅުވިއެވެ. "އަޅުގަނޑު ދެންނެވިން ރައީސް ޔާމީނޭ، ރައީސް ޔާމީނުގެ ވެރިކަމުގައި ރައީސް އޮފީހުގައި އަޅުގަނޑު ރައީސް ޔާމީނާ ބައްދަލުކޮށް ނުދަންނަވަންތޯއޭ އަދީބު ތިޔަކަހަލަ ގޯސް ކަންތައް ކުރައްވާ ވާހަކަ. އެދުވަހު އެ ފިޔަވަޅު ނޭޅުއްވީމާ ނޫންތޯއޭ މި ހިސާބަށް ކަންތައް މިއައީ،" އިމްރާން ވިދާޅުވިއެވެ.
މިދަތުރުފުޅުގައި ރައީސް ޔާމީންގެ ހާލު ބެއްލެވި ކަމަށާއި ޑޮކްޓަރުން އެރުވި ލަފާވެސް އައްސަވާ، އާއިލާއާ ވެސް ހިއްސާ ކުރެއްވި ކަމަށް މިނިސްޓަރު ވިދާޅުވިއެވެ. އަދި އެގޮތަށް ކަންތައް ކުރެއްވީ އެއްވެސް ކަހަލަ ޒާތީ ކަމެއް ޔާމީނާ މެދު ނުގެންގުޅުއްވާތީ ކަމަށާއި އަނިޔާވެރިކަން އިސްުކުރުމުގެ ވިސްނުމެއް މިސަރުކާރުގަ ނެތީމަ ކަމަށް އިމްރާން ވިދާޅުވިއެވެ.