އަންނަ އެޕްރީލް 4 ވަނަ ދުވަހު ބާއްވާ ލޯކަލް ކައުންސިލް އިންތިހާބުގައި ވެރިކަން ކުރާ މައި ޕާޓީ އެމްޑީޕީއަށް 13 ގޮޑި ކަށަވަރުވެފައިވާ ކަމަށް އިލެކްޝަން ކަމިޝަން (އީސީ)އިން ބުނެފިއެވެ.
އިލެކްޝަން ކަމިޝަނުން ރޭ ބޭއްވި ނޫސް ކޮންފަރެންސްގައި ކަމިޝަންގެ ރައީސް އަހުމަދު ޝަރީފު ވިދާޅުވީ ލޯކަލް ކައުންސިލްގެ 15 ދާއިރާއަކަށް ކުރިމަތިލާފައިވަނީ ޝަރުޠު ފުރިހަމަވާ އެންމެ ކެންޑިޑޭޓަކަށް ވުމުން އެދާއިރާތަކުގައި އިންތިހާބު ބޭއްވުމަކާއި ނުލައި އެކެންޑިޑޭޓުން ހޮވިފައިވާ ކަމަށެވެ.
ޝަރީފު ވިދާޅުވީ ގޮޑި ކަށަވަރުވެފައިވާ 15 ދާއިރާގެ ތެރެއިން 13 ދާއިރާއަށް ކުރިމަތިލާފައިވަނީ އެމްޑީޕީގެ ކެންޑިޑޭޓުން ކަމަށެވެ. އަދި ދެ ދާއިރާއަށް އަމިއްލަ ކެންޑިޑޭޓުން ހޮވިފައިވާ ކަމަށް ޝަރީފު ވިދާޅުވިއެވެ. ނަމަވެސް އެއީ ކޮންކޮން ދާއިރާއެއް ކަމަށް ޝަރީފު ވިދާޅެއް ނުވެއެވެ.
ކައުންސިލް އިންތިހާބުގައި އައްޑޫގެ 12 ގޮޑީގެ ތެރެއިން ހިތަދޫ ބޭރުމަތި ދާއިރާގެ ގޮޑި ވަނީ އެ ދާއިރާއަށް ކުރިމަތިލީ އެމްޑީޕީ ކެންޑިޑޭޓު މަރިޔަމް ސައީދާ (މަރީ)އަށް ކަށަވަރުވެފައެވެ. އެހެންވެ އެދާއިރާގެ އިންތިހާބެއް ނުބާއްވާނެއެވެ.
މީގެ އިތުރުން ނ. އަތޮޅު ކުޑަފަރީ ތިން ދާއިރާއަކަށް ވެސް ވަނީ އެމްޑީޕީ ކެންޑިޑޭޓުން އިންތިހާބުވެފައެވެ.
އެމްޑީޕީން ވަނީ މި އިންތިހާބުގައި 898 ދާއިރާއަކަށް ކުރިމަތިލާފައެވެ. ޕީޕީއެމްއިން 600 އަށް ވުރެ ގިނަ ދާއިރާއަށް ވަނީ ކުރިމަތިލާފައެވެ.