ހެލްތު މިނިސްޓްރީން ރާއްޖޭގެ ރަށްތަކުގައި ކުރިޔަށް ގެންދަން ނިންމާފައިވާ 20 މަޝްރޫއުއެއް ލާމަރުކަޒީކޮށް ކައުންސިލްތަކާއި މިއަދު ހަވާލުކޮށްފިއެވެ.
މިއަދު ހެލްތު މިނިސްޓްރީގައި ބޭއްވި ހާއްސަ ރަސްމިއްޔާތެއްގައި އެކަމާ ގުޅޭ އެއްބަސްވުމުގައި ވަނީ ސޮއިކޮށްފައެވެ. އެ އެއްބަސްވުމުގައި ކައުންސިލްތަކުގެ ފަރާތުން ސޮއިކުރެއްވީ ކޮންމެ ރަށެއްގެވެސް ކައުންސިލް މެމްބަރެކެވެ.
މަޝްރޫއުތައް ހިންގަން ހަވާލުކުރީ، ހއ. މާރަންދޫ، ހއ. ފިއްލަދޫ، ހއ. ވަށަފަރު، ހދ. ވައިކަރަދޫ، ހދ. މަކުނުދޫ، ހދ. ފިނޭ، ނ. ކެނދިކުޅުދޫ، ރ. ހުޅުދުއްފާރު، ރ. ވާދޫ، އއ. ފެރިދޫ، އދ. ދިގުރަށް، އދ. ދަނގެތި، މ. މުލައް، ލ. މާމެންދޫ، ގއ. މާމެންދޫ، ގއ. ދެއްވަދޫ، ގއ. ނިލަންދޫ، ގދ. ފިޔޯރީ، ގދ. މަޑަވެލި އަދި ސ. ހުޅުދޫގެ ކައުންސިލަށެވެ.
ކައުންސިލްތަކާއި މަޝްރޫއުތައް ހަވާލު ކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ހެލްތު މިނިސްޓަރު އަބްދުﷲ އަމީން ވިދާޅުވީ ރައީސް އިބްރާހިމް މުހައްމަދު ސޯލިހުގެ ސިޔާސަތުތަކުގެ ދަށުން ފާއިތުވި އެތައް އަހަރެއްގައި ދެކެފައިނުވާ ކުރިއެރުން ސިއްހީ ދާއިރާ އިން މި ފަސް އަހަރުތެރޭ ހާސިލުކުރާނެ ކަމަށާއި އެގޮތުން ފުރަތަމަ އަހަރު ކުރި މަސައްކަތުގެ ނަތީޖާގެ ރާހަތުގެ ބޮޑު ބައެއް މިއަހަރު ފެންނަން ފަށާނެ ކަމަށެވެ.
"ސަރުކާރާއެކީގައި ތިއްބެވުމަށް އިލްތިމާސްކުރަން. ސަރުކާރުން އެދޭ ކަންކަމުގައި އެހީތެރިވުމަށް އިލްތިމާސްކުރަން. މި ސަރުކާރު ކާމިޔާބު ސަރުކާރަކަށް ހެދުމަށް ރައްޔިތުންގެ އެހީތެރިކަމަށް އިލްތިމާސްކުރަން. މި ސަރުކާރު ކާމިޔާބުވެއްޖެނަމަ، އެ ކާމިޔާބު ވަނީ ކުރިއަށް އޮތް އެތައް އަހަރެއް" އަމީން ވިދާޅުވިއެވެ.
މި ސަރުކާރަކީ މުޅި ރައްޔިތުންގެ މަސްލަހަތާއި އެކީގައި، އެކި އެކި ފިކުރާއި ހިޔާލު ހިމެނިގެން އެންމެންގެ މަސްލަހަތު އިސްކުރާ އަދި މިއިން ޒަމާނެއްގައި ވެސް ގާއިމު ކުރެވިފައިނުވާ ވަރުގެ ސަރުކާރެއް ކަމަށްވެސް އަމީން ވިދާޅުވިއެވެ.
އެގޮތުން އެންމެންގެ މަސްލަހަތު އިސްކުރާ ސަރުކާރެއް ވެގެންދާނީ، ކުރިއަށް އޮތް އެތައް އަހަރަކަށް އޭގެ މަންފާ ކުރާނެ ސަރުކާރަކަށް ކަމަށާއި މިއީ ރައްޔިތުންގެ މަސްހަލަތު ކަމަށްވެސް އަމީން ވިދާޅުވިއެވެ. އަދި މިއީ އެއްވެސް ހާލެއްގައި ސިޔާސީ ބޭނުމެއްގައި ދެއްކި ވާހަކަތަކެއް ނޫން ކަމަށާއި މިއީ ގައުމީ މަސްލަހަތަށްޓަކައި ކޮންމެހެން ކުރަންޖެހޭ ކަމެއް ކަމަށްވެސް އޭނާ ވިދާޅުވިއެވެ.
ލާމަރުކަޒީ ނިޒާމަށް ސަރުކާރުން ގެނެސްފައިވާ އިސްލާހުގައިވާ ގޮތުން ފަސް މިލިއަނަށްވުރެ ކުޑަ މަޝްރޫއުތައް ކައުންސިލް އަށް ކުރިޔަށް ގެންދެވޭނެއެވެ. އެ ކައުންސިލްތަކާ ހަވާލުކުރި ގިނަ މަސައްކަތަކީ، ސިއްހީ މަރުކަޒަށް އިތުރުކުރާ ބައި ހެދުމުގެ ކަންކަމެވެ.