މި ސަރުކާރުން ރާއްޖޭގެ ރަށްތަކުގައި ކުރިޔަށް ގެންދާ އުމްރާނީ ތަރައްގީގެ މަޝްރޫއުތަކުގެ އަދަދު 500އަށްވުރެ މައްޗަށް އަރައިފިއެވެ.
ރައީސް އޮފީހުން ރޭ ވަނީ މި ސަރުކާރުން ކުރިޔަށް ގެންދާ މަޝްރޫއުތަކުގެ ތަފްސީލާއި އެ މަޝްރޫއުތައް މިހާރު ގޮސްފައިވާ ހިސާބުތައް ހިއްސާކޮށްފައެވެ. އެގޮތުން މި ސަރުކާރުން ރާއްޖޭގެ އެކި ސަރަައްދުތަކުގައި 547 މަޝްރޫއުއެއް ކުރިޔަށް ގެންދާއިރު އޭގެތެރެއިން 49 މަޝްރޫއުއެއް މިހާރު ވަނީ ނިމިފައެވެ. އަދި 152 މަޝްރޫއުއެއް މިހާރުވެސް ޑިޒައިންގެ މަސައްކަތް ނިމިފައިވާ ކަމަށާއި 73 މަޝްރޫއެއްގެ އީއައީ މަރުހަލާ ނިމިފައިވާ ކަމަށް ރައީސް އޮފީހުން ހާމަކުރެއެވެ. އަދި 49 މަޝްރޫއުއެއްގެ ސާވޭ މަސައްކަތް ކުރިޔަށްދާ ކަމަށްވެސް ރައީސް އޮފީހުން ހާމަކުރި މައުލޫމާތުތަކުން އެނގެއެވެ. މިއާއެކުގައި 6 މަޝްރޫއެއްގެ މަސައްކަތް ހުއްޓިފައިވާ ކަމަށްވެސް އެ މައުލޫމާތުތަކުން އެނގެއެވެ. ނަމަވެސް މަސައްކަތް ހުއްޓިފައި ވަނީ ކޮން ސަބަބަކާއި ހެދި ކަމެއް ރައީސް އޮފީހަކުން ހާމައެއް ނުކުރެއެވެ.
ސަރުކާރުން ކުރިޔަށް ގެންދާ މަޝްރޫއުތަކުގެ ތެރޭގައި އާއްމު ރައްޔިތުންގެ އެންމެ ބޮޑު އެއް ކަންބޮޑުވުން ކަމަށްވާ ބޯހިޔާވަހިކަމާއި ގުޅޭ މަޝްރޫއުތަކެއްގެ މަސައްކަތްވެސް ބާރު ސްޕީޑުގައި އަންނަނީ ކުރަމުންނެވެ. ނަމަވެސް އޭގެތެރެއިން ބައެއް މަޝްރޫއުތަކުގެ މަސައްކަތް އަދި ފެށިފައެއްވެސް ނުވެއެވެ.
އެމްޑީޕީން ކާނިވާ ސަރަހައްދުގައި މި މަހުގެ 20ވަނަ ދުވަހު ބޭއްވި ޖަލްސާގައި ވާހަކަދައްކަވަމުން ރައީސް އިބްރާހީމް ސޯލިހު ވިދާޅުވީ ރާއްޖޭގެ އެކި ކަންކޮޅުތަކުގައި 500 އަށް ވުރެ ގިނަ މަޝްރޫއު ހިންގުމަށް ސަރުކާރުން ނިންމާފައިވާ ކަމަށާއި ސެންޓްރަލައިޒް ގޮތަކަށް މަރުކަޒު ކުރެވިގެން މިފަދަ މަޝްރޫއުތައް އެއްފަހަރާ ހިންގުމަކީ ނާދިރު ކަމެއް ކަމަށެވެ.