ކުރުގާ ގޯދިއްޔާ ފުޓްސަލްގެ ގްރޫޕް އޭގެ އެއްވަނަ ކުޅުނު ހުރިހާ މެޗަކުން މޮޅުވެ ފޭދޫ ޔޫތު ކޮމިއުނިޓީ (އެފްވައިސީ) ހޯދައިފިއެވެ. ރޭ އެފްވައިސީ އާއި އެފްސީ ރެސްޕެކްޓް ބައްދަލުކުރި މެޗް 6-1 ލަނޑުން ކާމިޔާބް ކުރީ އެފްވައިސީއެވެ.
އެފްވައިސީއަށް ލަނޑުޖަހައި ދިނީ އިބްރާހިމް ލަޠީފް އާއި ހަސަން ލަޠީފް، ޠާހާ މުހައްމަދު އަދި އަލީ ޝިފާއުއެވެ. ޝިފާއު ވަނީ 3 ގޯލް ޖަހައި މޮޅު ކުޅުންތެރިއާ ހޯދާފައެވެ.
އެފްސީ ރެސްޕެކްޓްގެ ހަމައެކަނި ގޯލް އެޓީމަށް ކާމިޔާބް ކޮށްދިނީ އަހުމަދު އަޒުމީއެވެ.
ގްރޫޕް އޭގެ ތާވަލަށް ބަލާއިރު 9 ޕޮއިންޓާއި އެކު ތާވަލްގެ ކުރީގައި އޮތީ އެފްވައިސީއެވެ. 6 ޕޮއިންޓާއި އެކު ތާވަލްގެ ދެވަނާގައި އޮތީ ފްރެންޑްސް ކްލަބްއެވެ. 4 ޕޮއިންޓާއި އެކު އޯޕީއެޗް 3 ވަނާގައި އޮތް އިރު ރެސްޕެކްޓް އޮތީ 1 ޕޮއިންޓާއި އެކު ތާވަލްގެ ހަތަރުވަނާގައެވެ. ރިއަލް މަރަދޫއަކަށް ޕޮއިންޓެއް ލިބިފައި ނުވެއެވެ.
ރޭ ކުޅުނު އިތުރު މެޗްތަކަށް ބަލާއިރު މަލްޓީ ޖީނިއަސް އާއި ޔަންގްވަންސް ބައްދަލު ކުރި މެޗް ނިމުނީ 4-4 ލަނޑުން އެއްވަރުވެގެންނެވެ. މެޗްގެ ފުރަތަމަ ހާފް 3 ލަނޑު ޖަހައި ޔަންގްވަންސް އިން ވަނީ މަލްޓީ ޖީނިއަސް އަށް ޕްރެޝަރަށް ވައްޓާފައެވެ. ނަމަވެސް ދެވަނަ ހާފްގައި މަލްޓީ ޖީނިއަސްއިން ވަނީ ހަމަލާތައް ގިނަ ކޮށް މެޗްގެ ނަތީޖާ ހަމަ ހަމަ ކޮށްފައެވެ.
ޔަންގް ވަންސްއަށް ލަނޑުޖަހައި ދިނީ އަލީ ސިނާން މުހައްމަދާއި، އަހުމަދު އިބްރާހިމް ދީދީ އާއި އަކްރަމް އަބްދުއް ރަޝީދުގެ އިތުރުން އަލީ ޝާހިންއެވެ. މަލްޓީ ޖީނިއަސް އަށް ލަނޑު ޖަހައި ދިނީ ބޮންޑާ އާއި މުހައްމަދު ޝުއާއުއެވެ. މިދެ ކުޅުންތެރިންވެސް ވަނީ 2 ގޯލް ޖަހާފައެވެ. މޮޅު ކުޅުންތެރިއަކަށް ހޮވުނީ ބޮންޑާއެވެ.
މިގްރޫޕަށް ބަލާއިރު މިވަގުތު ތާވަލްގެ ކުރީގައި 6 ޕޮއިންޓާއި އެކު އޮތީ ޒިލޯންއެވެ. 4 ޕޮއިންޓާއިއެކު 2ވަނާގައި އޮތީ މަލްޓީ ޖީނިއަސްއެވެ. ޔަންގް ވަންސް އާއި ކެންޑާ އެފްސީއަށް 2 ޕޮއިންޓް ލިބިފައިވާ އިރު ރެސްކިއުއަށް ލިބިފައިވަނީ 1 ޕޮއިންޓެވެ.
ގްރޫޕް ބީގައި ހަބޭސް އާއި ކްލަބް މަރަދޫ ބައްދަލު ކުރި މެޗް ނިމުނީ 1-1 ލަނޑުން ދެ ޓީމް އެއްވަރުވެގެންނެވެ. ހަބޭސް އަށް ލަނޑު ޖަހައިދިނީ އަހުމަދު މުއާޒްއެވެ. ކްލަބް މަރަދޫއަށް ލަނޑުޖަހައިދިނީ ހަސަން އަބްދުއް ސަމަދުއެވެ. މޮޅު ކުޅުންތެރިއަކަށް ހޮވުނީވެސް ހަސަން އަބްދުއް ސަމަދުއެވެ.
ގްރޫޕް ބީގެ ތާވަލަށް ބަލާއިރު 9 ޕޮއިންޓާއި އެކު ތާވަލްގެ ކުރީގައި އޮތީ ޒިލޮޓްއެވެ. 5 ޕޮއިންޓާޢި އެކު ކްލަބް މަރަދޫ 2ވަނާގައި އޮތް އިރު 4 ޕޮއިންޓާއި އެކު ހަބޭސް އޮތީ 3 ވަނާގައެވެ. ޔުނިއަން ސްޕޯޓްސްއަށް ޕޮއިންޓެއް ލިބިފައިވާއިރު މާކަރީ ޔުނައިޓެޑްއަށް ޕޮއިންޓެއް ލިބިފައި ނުވެއެވެ.
ގްރޫޕް ސީގެ 1 ވަނާގައި 6 ޕޮއިންޓާއިއެކު ޝަންގްރިއްލާއޮތް އިރު އަބާނީއަށް ވެސް ލިބިފައިވަނީ 6 ޕޮއިންޓެވެ. ނަމަވެސް ގޯލް ތަފާތުން ކުރީގައި އޮތީ ޝަންގްރިއްލާއެވެ. 3 ޕޮއިންޓާއިއެކު ޓީއެފްޓީ 3 ވަނާގައި އޮތްއިރު އެފްއާރްޓީ އާއި ޒެފިއާއަށް ލިބިފައިވަނީ އެންމެ ޕޮއިންޓެކެވެ.
މިރޭ ވެސް މި މުބާރާތުގެ 3 މެޗް ކުޅޭނެއެވެ. ފުރަތަމަ މެޗްގައި ބައްދަލު ކުރާނީ ޝަންގްރިއްލާ އަދި އަބާނީ އެވެ. ދެވަނަ މެޗްގައި ބައްދަލު ކުރާނީ ޒެލޯން އާއި ކެންޑާ އެފްސީއެވެ. ފަހު މެޗްގައި ކުޅޭނީ އޯޕީއެޗް އާއި ފްރަންޑްސް ކްލަބެވެ.