ގްރީން ޓެކުހުގެ ފައިސާއިން މިދިޔަ މަހުގެ ނިޔަލަށް 584 މިލިއަން ރުފިޔާ ހޭދަ ކޮށްފައިވާ ކަމަށް ފިނޭންސް މިނިސްޓްރީގެ ތަފާސް ހިސާބުން ދައްކައިފިއެވެ.
"ގްރީން ފަންޑު" ގެ ރިޕޯޓުގައިވާ ގޮތުން މިދިޔަ ޖެނުއަރީ މަސް ނިމުނުއިރު ގްރީން ފަންޑުން 584.8 މިލިއަން ރުފިޔާ ވަނީ ހޭދަކޮށްފައެވެ. ރިޕޯޓުގައިވާ ގޮތުގައި ގްރީން ފަންޑުގެ އެ ފައިސާ ބޭނުން ކޮށްފައިވަނީ އަބޫދާބީ ފަންޑުގެ އެހީގައި ޒޯން އަތެއް ހިމެނޭ ރަށްރަށުގައި ހިންގާ ކުނިން ހަކަތަ އުފެއްދުމުގެ މަޝްރޫއަކަށް ހޭދަ ކުރި 214.7 މިލިއަން ރުފިޔާ އާއި ޒޯން އެކެއް ހިމެނޭ ރަށްރަށުގެ ކުނި ނައްތާލުމުގެ މަޝްރޫއު އަކަށް ބޭނުންވާ ސާމާނު ހޯދުމަށް ހޭދަ ކުރި 174 މިލިއަން ރުފިޔާއެވެ.
މީގެ އިތުރުން ހިމެނެނީ އޯޕެކް ފަންޑު ފޯ އިންޓަނޭޝަނަލް ޑިވެލޮޕްމަންޓް (އޮފިޑް) އިން ހިންގާ ކުނި މެނޭޖު ކުރުމުގެ މަޝްރޫއަށް ހަރަދު ކުރި 195 މިލިއަން ރުފިޔާއެވެ.
މިދިޔަ މަސް ނިމުނުއިރު ގްރީން ފަންޑަށް 84 މިލިއަން ރުފިޔާ ޖަމާކޮށްފައިވެއެވެ. އެއީ ރިސޯޓުތަކާއި ހޮޓާތަކާއި ގެސްޓު ހައުސްތަކުން ޖަމާކޮށްފައިވާ 82 މިލިއަން ރުފިޔާއާ ސަފާރީ އުޅަނދުތަކުން ޖަމާކޮށްފައިވާ 2.3 މިލިއަނ ރުފިޔާއެވެ.