ރައްޔިތުންގެ މަޖިލީހަށް ހުށަހަޅާ ބިލުތަކަށް އާއްމުންގެ ހިޔާލުތައް ހޯދުމަށް ބައްދަލުވުންތައް ބޭއްވުމަށް ވިސްނުންފުޅު ގެންގުޅުއްވާ ކަމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިފަދައިން ވިދާޅުވީ ސަރުކާރުގެ ފަރާތުން އިނގުރައިދޫ ދާއިރާގެ މެމްބަރު ހަސަން އަހުމަދު (ހަސަންޓޭ) ވަނީ ދިވެހިރާއްޖޭގެ ހަކަތައިގެ ބިލު ހުށަހަޅުއްވާ ނިންމެވުމުންނެވެ. ނަޝީދު ވިދާޅުވީ މަޖިލީހަށް ހުށަހެޅޭ ބިލުތަކަށް އާއްމުންގެ ހިޔާލު ހޯދުމަށް މަޖިލީހުގެ ގަވާއިދުގައިވެސް ލާޒިމް ކޮށްފައިވާ ކަމަށެވެ.
ނަޝީދު ވިދާޅުވީ ރައްޔިތުންނަށް މިހާރު ލިބިގެންދާ ފުރުސަތަށް ވުރެ ފުޅާ ފުރުސަތުތަކެއް މަޖިލީހަށް ހުށަހެޅޭ ބިލުތަކަށް ހިޔާލު ހޯދަން ލިބެންޖެހޭ ކަމަށެވެ. އެގޮތުން ވިދާޅުވީ އެކަމުގައި ރައްޔިތުންގެ ބައިވެރިވުން އޮންނަ މިންވަރު އިތުރު ކުރުމަށް މިދިޔަ ހަފްތާގައި މަޖިލީހުގެ އާންމު ކޮމިޓީގެ މުގައްރިރާއި، މަޖިލީހުގެ އަމީންއާންމާއި، ކައުންސިލާ ޖެނެރަލްއާ މަޝްވަރާ ކުރެއްވި ކަމަށެވެ. އެގޮތުން ރައްޔިތުންނަށް މަޖިލީހަށް ގޮސް، ބިލުތަކަށް ހިޔާލު ހުށަހެޅޭނެ އިންތިޒާމު ހަމަޖައްސައިދިނުމުގެ ވިސްނުންފުޅު ގެންގުޅުއްވާ ކަމަށް އެމަނިކުފާނު ވިދާޅުވިއެވެ.
ނަޝީދު ވަނީ އެ މަސައްކަތް ކުރެވިގެން ދާނެ ގޮތްވެސް ހިއްސާ ކުރައްވާފައެވެ. އެގޮތުން ވިދާޅުވީ އެ މަސައްކަތް ކުރިޔަށް ދާނީ ރައްޔިތުން މަޖިލީހުގެ އާ އިމާރާތުގައި ކަމަށެވެ. އެ ބައްދަލުވުންތަކުގައި ބިލު ހުށަހަޅުއްވާ މެމްބަރާއި، ސަރުކާރުގެ ފަރާތުން ހުށަހަޅާ ބިލެއް ނަމަ ސަރުކާރު ހިންގާ ޕާޓީގެ ޕީޖީ ލީޑަރާއި، ސަރުކާރުގެ ފަރާތުން އެ ބިލާ ބެހޭގޮތުން އިތުރު މައުލޫމާތު ދެވޭނެ ބޭފުޅުން ބައިވެރިވެވަޑައިގަންނަވާނެ ކަމަށް ނަޝީދު ވިދާޅުވިއެވެ. އެފަދަ ބައްދަލުވުންތައް ބާއްވާނީ ރޭގަނޑުގެ ވަގުތެއްގައި ކަމަށްވެސް އެމަނިކުފާނު ވިދާޅުވިއެވެ.
މިހާރު ބިލުތަކަށް ހިޔާލު ހޯދަން ހުޅުވާލަނީ އިބްތިދާއީ ބަހުސް ނިމި، ބިލު ކޮމިޓީއަށް ފޮނުވުމުން ކޮމިޓީއިންނެވެ.