ދިވެހިރާއްޖޭގެ މަތީ ފަންތީގެ ބޭފުޅުންގެ ބަރަހަނާ ފޮޓޯ އަދި ވީޑިއޯ ލީކު ވުމަކީ ދޭތެރެ ދޭތެރެއިން ހިނގާކަމެކެވެ. މިހާރު މިގޮތަށް ލީކުވެގެން މި އުޅެނީ ދައުލަތުގެ އެއްބާރު ކަމަށް ވާ ސްޕްރީމް ކޯޓުގެ 7 ފަނޑިޔާރުންގެ ތެރެއިން ފަނޑިޔާރެއްގެ ވީޑިއޯ އެވެ.
ސޯޝަލް މީޑިއާގައި ވަރަށް ބާރަށް ފެތުރެމުންދާ ވީޑިއޯތަކުގައި ފެންނަނީ ފަނޑިޔާރު އަލީ ހަމީދު ސްރީ ލަންކާގެ ހޮޓެލް ރޫމެއްގެ ތެރޭގައި ރަޝިއާ އަދި ލަންކާގެ ކަސްބީން ތަކަކާއި އެކު ފާހިޝް އަމަލުތަކަށް އަރައި ގަންނަ މަންޒަރެވެ.
އަލީ ހަމީދު ފެނިފައި ހުރި މީހަކަށް އެ ވީޑިއޯ ތަކުގައި އެ ފެންނަނީ އަލީ ހަމީދުކަން ހަމަ ރަނގަޅަށްވެސް އެނގޭނެއެވެ. ފެންނަން ހުރި ހެކިތަކަށް ބަލާއިރު އެއީ ހަމަ ހަޤީގަތުގައިވެސް އަލީ ހަމީދުކަން އެނގެ އެވެ.
ދުނިޔޭގަ ލެއްވިހާގޮތަކަށް ޖިންސީ އަމަލުތައް ހިންގުމުގެ އިތުރަށް "ވައިޓް ވައިން" ( ބަނގުރަލުގެ ވައްތަރެއް) ހިއްޕަވާ ވާހަކަވެސް އަލީ ހަމީދު ދައްކައެވެ. ކުރުގޮތަކަށް ބުނާނަމަ ވީޑިއޯތަކުން ފެންނަނީ ކުރެވެން ހުރި ހުރިހާ ނުބައިކަމެއް އަލީ ހަމީދު ކުރާތަނެވެ.
މިހާހިސާބަށް އައިއިރު އަލީ ހަމީދު އާއި ދޭތެރޭ އެއްވެސް މުއައްސަސާއަކުން ފިޔަވަޅެއް އަޅާފައެއް ނުވެއެވެ. ފަނޑިޔާރުންނާއި ބެހޭ ޝަކުވާތައް ބެލުމާއި، އެ ފަރާތްތަކާއި މެދު އަޅަން ޖެހޭ ފިޔަވަޅުތައް އެޅުމާއި މަޤާމުން ވަކިކުރަން ޖެހޭ މީހުން ވަކި ކުރުމަށް ހުށަހަޅަން ޖެހޭ ފަރާތްތަކަށް އެފަދަ މީހުން މަޤާމުން ވަކި ކުރުމަށް ހުށަހަޅަން ޤާނޫނު އަސާސީ ލާޒިމު ކޮށްފައިވަނީ ޖުޑީޝިއަލް ސާވިސް ކޮމިޝަން އަށެވެ.
މި މައްސަލަ ފެންމަތިވުމުން، މި ވީޑިއޯ ދިރާސާ ކުރުމަށް ޖޭއެސްސީ އިން ވަނީ ހާއްސަ ކޮމިޓީ އެއް އުފައްދާފައެވެ. އެ ކޮމިޓީއިން ނިންމީ މައްސަލަ ބަލާ ނިމެންދެން އަލީ ހަމީދު ސަސްޕެންޑު ކުރުމަށެވެ. ނަމަވެސް ޖޭއެސްސީ އިން އެކަން އެގޮތަކަށް ނުކުރިއެވެ.
ދެން މިކަހަލަ ކަންތައްތަކުގައި ހެސްކިޔާފައި އަޑުގަދަ ކޮށް މޮޅެތި ބަޔާންތައް ނެރެ އުޅެނީ ސިޔާސީ ޕާރޓީތަކުންނެވެ. ނަމަވެސް މިފަހަރު ސިޔާސީ ޕަރޓީތަކުންވެސް މިވަނީ "ހަނު" ހުރުމުގެ މިނިވަންކަން އިހުތިޔާރުކޮށްފައެވެ. މިއަށްވުރެ މާ ކުޑަ ކުޑަ ކަންކަމުގައި ޕާރޓީތަކުން މުޒާހަރާކޮށްފައި އެބަހުއްޓެވެ.
ޖުޑިޝިއަރީ އިސްލާހު ކުރުމަށް ބުނެ ގާޒީ އަކު ހައްޔަރު ކުރި ޕާރޓީގެ ފަރާތުން ވެސް މިކަމުގައި ބުނާނެ އެއްޗެއް ނެތެވެ. އެ ޕާރޓީގެ "ފިސާރި" އަންހެން ބޭކަނބަލުންނާއި، "ބިރުފަހަނަޅާފައިވާ" ފިރިހެން ބޭކަލުން ވެސް މިފަހަރަކު ނުފެނެއެވެ. އެމްޑީޕީ އަށް "އާ ބާރެއް" ދީ އެޕާރޓީ އާއި ގުޅި ވަޑައިގެންނެވި ރައްޔިތުންގެ މަޖްލީހުގެ ރައީސް އަބްދުﷲ ޝާހިދު ޖޭއެސްސީގާއި އަލީ ހަމީދު ސަސްޕެންޑު ކުރުމާއިމެދު ގޮތެއް ނިންމުމަށް ބޭއްވި ބައްދަލުވުމަށް ހާޒިރުވެފައެއްވެސް ނުވެއެވެ. މިކަމުން ފަނޑިޔާރުގެ އިސްލާހުކުރަން މި ޕާރޓީ އަހަމިއްޔަތުކަން ދޭވަރު ފެނެއެވެ.
ޢަދުލު އިންސާފު ޤާއިމް ކޮށް އިސްލާމީ ޝަރީއަތް ޤާއިމް ކުރާނެ ކަމަށް ބުނާ އުމަރު ނަސީރު ގެ އަޑެއް ވެސް މިކަމުގައި ނީވެއެވެ.
ރައީސް ވަހީދު ވިދާޅުވީ އަލީ ހަމީދުގެ ވީޑިއޯ އެއީ ހަޤީގަތެއްނަމަ އެއީ "ދެރަ" ކަމެއް ކަމުގައެވެ. އަދި އެމަނިކުފާނުވެސް ބޮޑަށް ކަންބޮޑުވުން ފާޅު ކުރީ އަލީ ހަމީދު ލައްވާ ބަޔަކު ބަރަހަނާ ފިލްމެއް "ކުޅުވީތީ" އެވެ. އެއްގޮތަކަށް ވެސް އަލީ ހަމީދު އެކަން ކުރުން މާ ބޮޑު މައްސަލައަކަށް ނުވެއެވެ.
ރައީސް ވަހީދު އެތަނަކަށް އެންމެ ދޯޅު އެމެރިކާގައި ހިނގިކަމަކަށް މިކަން ވިނަމަ މިހާރު ތި ފަނޑިޔާރު ހުންނާނީ ގޭގައެވެ. ރައީސް ވަހީދަށް މިސާލު ނަންގަވަން އެނގެނީ ހަމައެކަނި ކެމްޕެއިން ދަތުރުގައި އެމެރިކާގެ ރައީސުން އެއަރފޯސް ވަން ބޭނުން ކުރައްވާ ކުރެއްވުމަށް އެކަނި އެވެ.
ޖޭއެސްސީގެ ރައީސުލް ޖުމޫހުރިއްޔާގެ މެމްބަރު ލަތީފާ ޤާސިމް ވޯޓު ދެއްވީ ވެސް އަލީ ހަމީދު ސަސްޕެންޑު ނުކުރުމަށެވެ. އަދި ރައީސް ވަހީދު އައްޔަން ކޮށްފައިވާ ބަންޑާރަ ނައިބު އާޒިމާ ޝުކޫރު ވެސް ވޯޓު ދެއްވީ އަލީ ހަމީދު ސަސްޕެންޑު ނުކުރަމަށެވެ. މިކަމުން ރައީސް ވަހީދުވެސް މިކަމާއި "ދެރަވެ" އަލީ ހަމީދަށް ހަމްދަރުދީ ވާ މިންވަރު އެބައެނގެއެވެ.
ޖޭއެސްސީއަށް މަޖްލީހުން އައްޔަންކޮށްފައި ހުރި މެމްބަރު، އަދި "ތަރައްޤީޤައިމު" ކޮއްދޭނަމޭ ވިދާޅުވާ ރިޔާސީ ކެންޑިޑޭޓް ޤާސިމް އިބްރާހިމް ވެސް މިކަމުގައި ޢަމަލުކޮށްފައިވަނީ އަލީ ހަމީދުގެ ދިފާޢުގައެވެ. އަލީ ހަމީދު ސަސްޕެންޑުނުކުރަން ތާޢީދުކޮށް ޤާސިމް އިބްރާހިމް ވޯޓު ދެއްވިއެވެ. ތަރައްޤީ ގައިމު ވަނީ އަދުލު އިންސާފު ގާއިމް ކުރެވިގެން ކަމަށް ޤާސިމް އިބްރާހިމް އަށްވެސް ހަމަ އެނގި ނުލައްވަނީ ބާއެވެ.
ޕީޕީއެމްގެ ރިޔާސީ ކެންޑިޑޭޓް ޔާމީން އަބްދުލްޤައްޔޫމު މިކަމާއިމެދު ވިދާޅުވާނެ އެއްވެސް އެއްޗެއް ނެތްކަހަލައެވެ. ޔާމީނު އެއްޗެއް ވިދާޅު ނުވިއަސް ލީކު ވެފައި ވާ އެއް ވީޑިއޯގައި ޔާމީނުގެ ވާހަކަ އަލީ ހަމީދު ދައްކައެވެ. ޔާމީނު މިކަންތަކާއި މެދު މާ ބޮޑު ފަރުވާލެއް ނެތީ މިއީ އިޤްތިސާދި ދާއިރާގެ ކަމަކަށް ނުވާތީ ކަމަށްވެސް ވެދާނެއެވެ. އެމަނިކުފާނަށް އެނގޭހާ އެއްޗަކީވެސް "އިޤްތިސާދު" ވިއްޔާ އެވެ.
ދީނީ ޢިލްމުވެރިން އެންމެ ގިނަ ޢަދާލަތު ޕާރޓީ އިންވެސް ބުނާނެއް އެއްޗެއް ހަމަނެތެވެ. ޢަދުލުވެރިކަމާއި ގުޅޭގޮތުން ކިރީތި ޤުރުއާނުގައި އެތަކެއް އާޔަތްތަކެއް ވެއެވެ. ސަދޫމު ފަދަ ތަންތަން ނެތިގެން ދިޔައީ އަދުލު ވެރިކަމާއި އިންސާފު އެތަނުން ގެއްލިގެން ދިޔުމުންނެވެ. "ޢަދާލަތު" ގެ ނަމުން ނަން ދެވިފައިވާ ސިޔާސީ ޕާރޓީއިން ޤައުމުގައި ޢަދާލަތު ގެއްލިގެން ދާއިރު މިތިބެނީ ބަސް ހުއްޓިފަ އެވެ.
ފަނޑިޔާރާއިމެދެ އެންމެ ފަސޭހައިން ގޮތެއް ނިންމޭނީ ރައްޔިތުންގެ މަޖްލިސް މެދުވެރި ވެގެންނެވެ. ނަމަވެސް މިއަދު އިވުނު ހަބަރަކީ ކުރާނެ މަސައްކަތެއް ނެތިގެން މަޖްލީހުގެ ޖަލްސާއެއް ނުބާއްވާ ވާހަކައެވެ. އަދި މި މައްސަލާގައި އަލީ ހަމީދުގެ ވަކީލަކަށް ވެސް އުޅުއްވަނީ މަޖްލިސް މެމްބަރެކެވެ.
ދައުލަތުގެ އެއްބާރު ރަމްޒުކޮއްދޭ ފަރާތެއް "އޮރިޔާން" ވެގެން އުޅޭއިރު ދައުލަތުގެ ބޮޑެތި މުއައްސަސާތައް މިތިބެނީ ބަސް ހުއްޓިފައެވެ. އެޅޭނެ ފިޔަވަޅެއްވެސް ނެތެވެ. އަލީ ހަމީދު ހަމަ އާދައިގެ މަތިން ކޯޓުގައި މައްސަލަތައް ބަލަމުން އެބަ ގެންދެއެވެ.
ޙުދު އުއްތަމަ ފަނޑިޔާރަށްވެސް ކުރެވޭ ހަމައެކަނި ކަމަކީ ކޯޓުތަކުގެ އިތުބާރު ގެއްލޭގޮތަށް ވާހަކަ ނުދެއްކުމަށް ގޮވާލައި ބަޔާންތައް ދިނުމެވެ. ކޯޓުތަކުގެ އިތުބާރު ރައްޔިތުންގެ ކުރިމީގައި މިވަނީ ވަރަށް ބޮޑަށް ގެއްލިފައެވެ. ނަޒާހާތްތެރިކަމެއް ނެއް އަޙުލާގެއް ނެތް ފަނޑިޔާރަކު ދިފާއު ކުރަން ހަދައިގެން މުޅި މުއައްސަސާގެ އިތުބާރު ވަނީ ގެއްލިފަ އެވެ.
ހަމީދާއި މެދު ފިޔަވަޅެއް އަޅަން ނުކެރިގެން އުޅޭ ކޮންމެސް ސަބަބެއްވާނެއެވެ. ފަހަރެއްގައި އަލީ ހަމީދު، މި ހުރިހާ ސިޔާސީ ބޭފުޅުން ބްލެކްމެއިލް ކުރައްވަނީ ކަމަށްވެސް ވެދާނެއެވެ. ހަމަ ޤައިމުވެސް އެނގޭ އެއްޗަކީ އަލީ ހަމީދު މިވަނީ މިފަހަރު ބިރެެއް ނެތި "މަޖާ" ކޮށްފައި ކަމެވެ. އެގޮތަށް މަޖާ ކުރެވޭނީ އެޅޭނެ ފިޔަވަޅެއް ނޯންނާނެކަން ޔަޤީންވާތީ އެވެ.