ގަވާއިދަށް ނުފެތޭ ކަމަށް ވިދާޅުވެ މިއަދު އެޖެންޑާ ނުކުރި ކުއްލި މައްސަލައަކީ އިންޑިއާގެ މުސްލިމުންނާއި ދެކޮޅަށް ހިންގާ ލާއިންސާނީ އަނިޔާއާ ގުޅިގެން މަޖިލީހަށް ހުށަހެޅި ކުއްލި މައްސަލައެއްކަން އެނގިއްޖެއެވެ.
މިއަދުވެސް ކުއްލި މައްސަލަ ހުށަހެޅުއްވީ އިއްޔެގެ ކުއްލި މައްސަލަވެސް ހުށަހެޅުއްވި ނޮޅިވަރަމް ދާއިރާގެ މެންބަރު މުހައްމަދު ނަޝީދެވެ. މިއަދުގެ ޖަލްސާ ހެނދުނު 9:00ގައި ފައްޓަވައި ދެއްވާ ވާހަކަފުޅުދައްކަވަމުން ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ މިއަދުގެ ޖަލްސާއަށްވެސް ކުއްލި މައްސަލައެއް ހުށަހަޅާފައިވާ ކަމަށާއި ނަމަވެސް އެ މައްސަލަ ރައްޔިތުންގެ މަޖިލީހުގެ ޤަވާއިދުގެ 170 ވަނަ މާއްދާގެ ހ އާއި 175 ވަނަ މާއްދާގެ ރ އާއި ކ އާ ޚިލާފު ކަމަށެވެ. އެހެންކަމުން އެމައްސަލަ ބަލައިނުގަންނަ ކަމަށް ރައީސް ނަޝީދު ވިދާޅުވި އެވެ.
ނަމަވެސް އެ މައްސަލައަކީ ކޮން މައްސަލައެއް ކަމާއި އެ މައްސަލަ މަޖިލީހަށް ހުށަހެޅުއްވީ ކޮން މެންބަރެއް ކަމެއް ނަޝީދު ވިދާޅެއް ނުވިއެވެ.
މެންބަރު ނަޝީދު ހުށަހެޅުއްވި ކުއްލި މައްސަލަ މަޖިލީހަށް ހުށަހަޅުއްވާ ސަބަބެއް ކަމަށް މެންބަރު ނަޝީދު ވިދާޅުވީ އިންޑިއާގައި މިހާރު މުސްލިމުންނާ ދެކޮޅަށް އެ ގައުމުގެ ސަރުކާރުން އިސްވެ އޮވެ ހިންގަމުންދާ ލާއިންސާނީ އަމަލުތައް ރާއްޖޭގެ ސަރުކާރުން އެއްވެސް ސިފައެއްގައި ކުށްވެރިކޮށްފައި ނުވާތީ އެކަން މަޖިލީހުގެ ސަމާލުކަމަށް ގެނައުން ކަމަށެވެ.
އިއްޔެވެސް މެންބަރު މުހައްމަދު ނަޝީދު ވަނީ މަޖިލީހަށް ކުއްލި މައްސަލައެއް ހުށަހަޅާފައެވެ. އެއީ އިސްލާމްދީނާއި ހިލާފު ވޯކްޝޮޕްތަކެއް ރާއްޖޭގައި ބާއްވަމުންދާ ކަމަށްބުނެ ހުށަހެޅި މައްސަލައެކެވެ. ނަމަވެސް އެ މައްސަލައަކީވެސް ގަވާއިދަށް ނުފެތޭ މައްސަލައެއް ކަމަށް ބުނެ މަޖިލިސް ރައީސް ވަނީ އެ މައްސަލަވެސް ބޭރު ކޮށްލާފައެވެ.