ދުނިޔޭގައި ހަލުވިކަމާއި އެކު ފެތުރެމުން އަންނަ ކޮވިޑް-19 އަށް ސަރުކާރުން ވަމުންދާ ތައްޔާރީތަކަށް އޮތް ހަމައެކަނި ދައްޗަކީ ހެލްތު މިނިސްޓަރު އަބްދުﷲ އަމީން ކަމަށް ރައްޔިތުން މަޖިލީހުގެ ވިލިފުށި ދާއިރާގެ މެންބަރު ހަސަން އަފީފް ވިދާޅުވެއްޖެއެވެ.
ކޮވިޑް-19 އާ ގުޅިގެން އިދިކޮޅު ޕީއެންސީގެ މެންބަރު އާދަމް ޝަރީފް ހުށަހެޅުއްވި ކުއްލި މައްސަލައަށް ބަހުސް ކުރައްވަމުން ހަސަން އަފީފް ވިދާޅުވީ ހެލްތު މިނިސްޓަރު އަމީން އަންނަނީ ސަރުކާރަށް ޖެއްސުން ކުރަމުން ކަމަށެވެ. އަދި ޖެއްސުން ކުރުމުގެ ގޮތުން ކުރާ ކަންކަމުގެ ސަބަބުން ސަރުކާރަށް ދަތިތަކާއި ކުރިމަތިލާން ޖެހޭ ކަމަށްވެސް އަފީފް ވިދާޅުވިއެވެ.
ކުއްލި މައްސަލަ ހުށަހެޅުއްވި މެންބަރު އާދަމް ޝަރީފަށް ފާޑު ވިދާޅުވެ އޭނާ ހުށަހެޅުއްވި މައްސަލައަކީ އެއްވެސް ހަގީގަތެއް އެކަމުގައި އެކުލެވޭ މައްސަލައެއް ނޫންކަން ފާހަގަކުރައްވާ އަފީފް ވިދާޅުވީ ކޮވިޑް-19 ދުނިޔެއިން އެންމެ ފުރަތަމަ ފެނުމާއި އެކުގައި އެކަމަށް އެންމެ ބޮޑަށް ތައްޔާރުވި އެއް ގައުމަކީ ރާއްޖެ ކަމަށެވެ. އެގޮތުން އެއާޕޯޓުތަކުގައި ސަލާމަތީ ކަންކަން ވަރުގަދަ ކުރުމުގައި ކުރީގައި އޮތީވެސް ރާއްޖެ ކަމަށް އޭނާ ވިދާޅުވިއެވެ.
"މި އެއާޕޯޓް އެރައިވަލްގައި މި ސަރަހައްދުން ވެސް އެންމެ ފުރިހަމައަށް ކެމެރާ ހަރު ކޮށްގެން ތައްޔާރަށް ތިބި ގައުމަކީ މި ރާއްޖެ، އަވަށްޓެރި ސްރީލަންކާގައި ވެސް ހުރީ ދެ ކެމެރާ، މި ރާއްޖޭގައި އެބަ ގެންގުޅޭ 10 ކެމެރާ، އަފީފް ވިދާޅުވިއެވެ.
އަފީފް ވިދާޅުވީ ކޮވިޑް-19 ގެ ސަބަބުން ރާއްޖެއިން ކާބޯތަކެތި ހުސްވެދާނެ ކަމަށް ބުނެ އާދަމް ޝަރީފް މައްސަލައެއް މަޖިލީހަށް ހުށަހެޅުއްވިއިރު އެކަމަށް ދިވެހި ސަރުކާރާއި އެސްޓީއޯ ވެސް އޮތީ ފުރިހަމައަށް ތައްޔާރަށް ކަމަށް ހަސަން އަފީފް ވިދާޅުވިއެވެ.
އަފީފް ވިދާޅުވީ އަމީނަކީ ޖުމްހޫރީ ޕާޓީގެ ސްލޮޓެއްގައި ހެލްތު މިނިސްޓަރު ކަމަށް ވަޑައިގެންނެވި ބޭފުޅެއް ކަމަށާއި ހަމައެކަނި ކޮވިޑް-10 އަށް ސަރުކާރުން ކުރަމުން ގެންދާ މައްސަލަތަކަށް ކުރިމަތިވާ ދައްޗަކީ އަމީން ކަމަށެވެ.
އަފީފް ދެން ވިދާޅުވީ ސަރުކާރުން ވަމުންދާ ތައްޔާރީގައި ދަތި ކަމެއް އަންނަނީ ހަމައެކަނި ހެލްތު މިނިސްޓްރީން އަންނަ ދަތި ކަމެއް ކަމަށެވެ. އެއީ ޖޭޕީގެ ސްލޮޓެއްގައި ހެލްތު މިނިސްޓަރު ކަމަށް ވަޑައިގެން ހުންނެވި އަމީން ސަރުކާރަށް ޖެއްސުން ކުރަމުން ދާތީ ދިމާވާ ދަތި ކަމެއް ކަމަށެވެ. އޭނާ ވަނީ ރައީސް އިބްރާހީމް މުހައްމަދު ސޯލިހުގެ އަރިހުން އަމީން ކުރައްވާ ކަންކަން ގާތުން ބެއްލެވުމަށް އިލްތިމާސް ކުރައްވާފައެވެ.