އޭޝިޔާގެ އެކި ގައުމުތަކަށް ދަތުރުކުރި އަދި އެ ދަތުރުގައި ރާއްޖޭގައިވެސް މަޑުކުރުމަށްފަހު ޗުއްޓީ ހޭދަކުރި މީހަކު އެނބުރި ޗިލީއަށް ދިޔައިރު ކޮވިޑް-19 އަށް ޕޮޒިޓިވްވި ވެފައިވާ ކަމަށް ބޭރުގެ ނޫސްތަކުގައި ބުނެފިއެވެ.
ޗިލީގެ އިންސްޓިޓިއުޓް އޮފް ޕަބްލިކް ހެލްތާ ހަވާލާދީ، ޗައިނާގެ ޝިންހުއާ ނޫސްއެޖެންސީ އިން ބުނެފައި ވަނީ އެއީ ޗިލީގައި ވައިރަހަށް ޕޮޒިޓިވްވި ފުރަތަމަ މީހާ ކަމަށެވެ. 33 އަހަރުގެ އެ ފިރިހެން މީހާއަކީ ޗިލީގެ ޓަލްކާ ސިޓީގައި ހުރި މީހެއް ކަމަށާއި އޭނާ ޗިލީއަށް ގޮސްފައި ވަނީ އޭޝިއާގެ ބައެއް ގައުމުތަކަށް ދަތުރު ކުރުމަށް ފަހު ޔޫރަޕް މަގުން ކަމަށް ވެސް ޗިލީގެ ހެލްތު މިނިސްޓްރީއާ ހަވާލާދީ އެގައުމުގެ ނޫސްތަކުގައި ބުނެފައިވެއެވެ.
އެމީހާ ވަނީ މަހެއްހާ ދުވަހުގެ ތެރޭގައި ސިންގަޕޫރާއި މެލޭޝިއާ އިންޑޮނޭޝިއާ، ރާއްޖެ އަދި ސްޕެއިނަށް ދަތުރުކޮށްފައެވެ. އެމީހާ ޗިލީއަށް ދިޔައީ މިދިޔަ މަހުގެ 25ގައެވެ. އަދި ކޮވިޑް-19ގެ އަލާމާތްތައް ފެންނަން ފެށީ މިމަހުގެ އެކެއްގައެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ރޭވެސް ބުނެފައިވަނީ ރާއްޖެއިން ކޮވިޑް-19 އަށް ޕޮޒިޓިވް ވެފައިވާ އެއްވެސް މީހަކު ފެނިފައި ނުވާ ކަމަށެވެ. އެހެންނަމަވެސް ޗިލީގެ މި ރިޕޯޓާއި ގުޅިގެން ބަލަންޖެހޭ ކަންކަން ބަލަމުން ކަމަށެވެ.