މަނީ ލޯންޑަރިންގެ ކުށް ސާބިތުވެ ފަސް އަހަރު ދުވަހަށް ޖަލަށްލުމަށް ހުކުމް ކޮށްފައިވާ ކުރީގެ ރައީސް އަބްދުﷲ ޔާމީން ގެއަށް ގެންގޮސްފިއެވެ. އެމަނިކުފާނު ގެއަށް ގެންދިޔައީ ކޮން ސަބަބަކާއި ހެދި ކަމެއް ނޭނގެއެވެ.
ބައެއް މީޑިއާތަކުގައި ބުނެފައި ވަނީ ރައީސް ޔާމީން ގެކޮޅަށް ގެންދެވީ އެމަނިކުފާނުގެ އެދިލެއްވުމުގެ މަތިން ކަމަށެވެ. ކޮންމެއަކަސް އެމަނިކުފާނު ގެއަށް ގެންދެވީ މިއަދު އޮތް އިސްތިއުނާފުގެ އަޑުއެހުމަށް ފަހުއެވެ.
ބައެއް މީޑިއާތަކުގައި ބުނެފައިވާ ގޮތުގައި ރައީސް ޔާމީން ގެކޮޅުގައި ގަޑިއެއްހާއިރު މަޑުކުރައްވާނެއެވެ. އަދި އެމަނިކުފާނުގެ އަރިހުގައި ފުލުހުންނާއި ކަރެކްޝަންސްގެ ބޭފުޅުންވެސް ގެކޮޅަށް ވަޑައިގެންނެވި ކަމަށްވެސް ބައެއް މީޑިއާތަކުގައި ރިޕޯޓުކޮށްފައިވެއެވެ. މިކަމާއި ގުޅިގެން "އައްޑޫލައިވް"އިން ރައީސް ޔާމީންގެ ގާނޫނީ ވަކީލުންގެ ޓީމުގެ ބޭފުޅަކާއި ގުޅާލުމުން ވިދާޅުވީ އެކަމުގެ މައުލޫމާތު މީޑިއާއަށް ފަހު އަރުވާނެ ކަމަށެވެ.
ރައީސް ޔާމީން ގެކޮޅަށް ގެންދިޔުމާއި ގުޅިގެން އެ ސަރަހައްދަށް އެމަނިކުފާނުގެ ވަރަށް ގިނަ އަދަދެއްގެ ސަޕޯޓަރުން ވަނީ އެއްވިއެވެ. ނަމަވެސް ފަހުން ފުލުހުން އެ ސަރަހައްދުން އާއްމުން ދުރަށްޖެއްސިއެވެ.