ކޮވިޑް 19 ވައިރަސް ޖެހުނު މީހުންގެ އަދަދު އެއް ލައްކައަށް އަރައިފިއެވެ.
ޔޫރަޕުގައި މިހާރު ވައިރަސް ހަލުވިކަމާއެކު ފެތުރެމުން އަންނައިރު އިޓަލީއާއި ފްރާންސު، ޖާމަނީ އަދި އިނގިރޭސި ވިލާތުގައި ވެސް އަންނަނީ ޕޮސިޓިވް ވިމީހުންގެ އަދަދު އިތުރުވަމުންނެވެ.
ފާއިތުވެދިޔަ 24 ގަޑިއިރު ތެރޭ ޔޫކޭގައި 48 މީހަކު ވަނީ ވައިރަސްއަށް ޕޮސިޓިވް ވެފައެވެ.
އިނގިރޭސި ވިލާތުގެ އިތުރުން ޔޫރަޕަށް ބަލާއިރު ފްރާންސުގައި ވެސް މިހާރު ވަނީ ހަލުވިކަމާއެކު މިބަލި ފެތުރެން ފަށާފައެވެ. އެންމެ ފަހުގެ މައުލޫމާތު ދައްކާ ގޮތުގައި ފްރާންސުގައި ޕޮސިޓިވްވި މީހުންގެ އަދަދު ވަނީ 577 އަށް އަރާފައެވެ. އަދި މަރުވި މީހުންގެ އަދަދު 9 އަށް ވަނީ އަރާފައެވެ.
ޖަރުމަނުވިލާތުގައި ވެސް ކޮވިޑް އަށް ޕޮސިޓިވް ވެފައިވާ 534 މީހުން އެބަތިއްބެވެ. ނަމަވެސް ޖަރުމަނުން މިހާތަނަށް މިބަލީގައި މީހަކު މަރުވެފައިވާ ކަމަށް ރިޕޯޓު ކޮށްފައެއް ނުވެއެވެ.
ޔޫރަޕުގައި އެންމެ ބޮޑަށް ކޮވިޑްގެ އަސަރު ކުރަމުން އަންނަނީ އިޓަލީއަށެވެ. އިޓަލީގައި މިހާރު 3858 މީހުން ޕޮސިޓިވްވެ، 148 މީހުން ވަނީ މަރުވެފައެވެ.