ދުނިޔޭގައި ހަލުވިކަމާއި އެކު ފެތުރެމުން އަންނަ ކޮވިޑް19 ގެ ސަބަބުންނާއި އަދި އެ ބައްޔަށް ޝައްކު ކުރެވޭ ބައެއް މީހުން މިހާރު ރާއްޖެއިން ވެސް ފެންނަމުން ދާތީ ކައުންސިލް އިންތިހާބުގެ ކެމްޕެއިނަށް މިހާރު ރަށްރަށަށް ގޮސް އުޅުއްވާ އިދިކޮޅު ކޯލިޝަންގެ ވަފްދުން ދަތުރު ކުރުކޮށްލުމަށް ނިންމައިފިއެވެ.
ޕްރޮގްރެސިވް ކޯލިޝަނުން ނެރެފައިވާ ނޫސްބަޔާނެއްގައި ބުނީ ކޮވިޑް19 އާ ގުޅިގެން ރައްޔިތުންގެ ސަލާމަތާއި ރައްކާތެރިކަމަށް އެޅެންހުރި ހުރިހާ ފިޔަވަޅެއް އެޅުމަށް ސަރުކާރަށް ގޮވާލާ ކަމަށެވެ.
އެ ބަޔާނުގައި އިދިކޮޅުން ބުނީ ދަތުރުތައް ކުރުކޮށްލުމަށްފަހު އެނބުރި މާލެ އައުމަށް އެ ކޯލިޝަނުން ނިންމީ ރާއްޖެއަކީ ކުޑަ ގައުމަކަށް ވެފައި އެފަދަ ނުރައްކާތެރު ބައްޔެއް ފެތުރިއްޖެ ނަމަ ކުރިމަތިވާނެ ދަތިތަކާއި ގެއްލުން ބޮޑުވާނެތީ ކަމަށެވެ. އެޕާޓީއަކީ އަބަދުވެސް ގައުމީ މަސްލަހަތު އެންމެ ފުރަތަމަވެސް އިސްކުރާނެ ޕާޓީއެއް ކަމަށާއި އަދި ދިވެހި ރައްޔިތުންގެ ރައްކާތެރިކަމަށް އިސްކަންދޭނެ ކަމުގެ ފުރިހަމަ ޔަގީންކަން ދިވެހި ރައްޔިތުންނަށް ދޭ ކަމަށްވެސް އެކޯލިޝަންގެ ބަޔާނުގައި ބުނެފައިވެއެވެ.
މީގެއިތުރުން އެ ކޯލިޝަނުން ވަނީ ހާމަކަން ބޮޑު ގޮތެއްގައި ރައްޔިތުންނަށް އެ ބައްޔާއި ގުޅޭ އެންމެ ފަހުގެ މައުލޫމާތުތައް ހިއްސާ ކުރުމަށް ސަރުކާރަށް ގޮވާވެސް ލާފައެވެ.