ވ. ތިނަދޫއިން ކޮވިޑް19 ގެ އަލާމާތްތައް ފެނިގެން ކަރަންޓީން ކުރުމަށް ގެންދިޔަ އިޓަލީގެ ފަތުރުވެރިޔާ އެ ބައްޔަށް ނެގެޓިވް ކަމަށް ހެލްތު ޕްރޮޓެކްޝަން އޮތޯރިޓީ (އެޗްޕީއޭ) އިން ބުނެފިއެވެ.
އެޗްޕީއޭއިން ބުނީ ކޮވިޑް19 އަށް ޝައްކުކުރެވޭ އަލާމާތްތައް ހުރެގެން ވ. ތިނަދޫއިން އައިސޮލޭޝަން ފެސިލިޓީއަށް ގެންދެވުނު ފަރާތުގެ ކޮވިޑް19 ގެ ޓެސްޓްވަނީ ނެގަޓިވްވެފައިވާ ކަމަށެވެ. ނަމަވެސް، ބައްޔަށް ޝައްކުރެވޭ އަލާމާތްތައް އަދިވެސް ހުރުމާއެކު 24 ގަޑިއިރު ފަހުން އިތުރަށް ޓެސްޓް ކުރެވޭނެެ ކަމަށެވެ.
އަދި މިކަމާގުޅިގެން ވ. ތިނަދޫ ގެ “ކޮންޓެކްޓް ޓްރޭސިންގ” ހެދުމާއި ބަލަންޖެހޭ އެހެނިހެން ބެލުންތައް ބެލުމަށް ފަހު މިހާރު އެރަށަށް އަރާ ފޭބުމަށް ހުރަހެއްނެތް ކަމަށެވެ.
އެޗްޕީއޭއިން މިހެން ބުނެފައިވާއިރު ކުރެއްދޫ އައިލެންޑު ރިސޯޓުންވެސް އިއްޔެ ވަނީ މީހަކު ކަރަންޓީނަށް ގެންގޮސްފައެވެ. އެއީ އެ ރިސޯޓުގެ ޑޮކްޓަރެވެ. އޭނާ ކަރަންޓީން ކުރުމާއި އެކު އެރަށްވެސް ވަނީ ލޮކްޑައުން ކޮށްފައެވެ. ނަމަވެސް ވަގުތީ ގޮތުންނެވެ.
އަދި މިއަދު ސަމާ އައިލެންޑުން އިތުރު ތިން މީހަކު ކަރަންޓީން ކޮށްފައިވާއިރު އެރަށްވެސް ވަނީ ލޮކްޑައުން ކޮށްފައެވެ.