މިއަދު ފާހަގަކުރަމުންދާ ބައިނަލް އަގުވާމީ އަންހެނުންގެ ދުވަހުގެ މުނާސަބާގައި ރައީސުލް ޖުމުހޫރިއްޔާ އަންހެނުން މުޖުތަމައުއަށް ކުރާ ޚިދުމަތްތަކުގެ އަގު ވަޒަން ކުރައްވައި ތަހުނިޔާ ދަންނަވައިފިއެވެ.
ރައީސް ސޯލިހް މިއަދު ހެނދުނު ކުރެއްވި ޓުވީޓެއްގައި ވިދާޅުވީ، އަންހެނުންގެ ބައިވެރިވުން ފުރިހަމައަށް ލިބުމުގައި އަންހެނުންނަށް ކުރިމަތިވާ ގޮންޖެހުންތަކާއި ހުރަސްތައް ނައްތާލަން ޖެހޭ ކަމަށެވެ. އަދި ދުނިޔެ ބޭނުންތެރި ދުނިޔެއަކަށް ވެގެން ދާނީ، ޖިންސީ ތަފާތުކުރުންތައް ނައްތާލެވިގެން ކަމަށް ރައީސް ވިދާޅުވިއެވެ.
އަންހެނުންގެ ކުރިއެރުމަށް މިއަދުގެ ސަރުކާރުން ގިނަގުނަ މަސައްކަތްތަކެއް ކޮށްފައިވާކަން ފާހަގަކޮށްލެއެވެ. އެގޮތުން ލާމަރުކަޒީ ގާނޫނު އިސްލާހުކޮށް ކައުންސިލްތަކުގައި އަންހެނުންނަށް ޚާއްސަކޮށް 33 އިންސައްތަ ގޮނޑި ކަނޑައަޅާފައިވަނީ މިސަރުކާރުންނެވެ.
ރައީސް ވިދާޅުވީ އެ ބަދަލުގެ ހެޔޮ މަސައްކަތް ކައުންސިލްތައް އިންތިޚާބުވުމުން ފެނިގެންދާނެ ކަމަށެވެ.
މީގެ އިތުރުން ރައީސް ސޯލިހް ވަނީ ވިހެއުމުން އަންހެނުންނަށް ލިބޭ ޗުއްޓީ ހަ މަސް ދުވަހަށް އިތުރުކޮށް ސިވިލްސާވިސްގެ އޮނިގަނޑަށް ބަދަލު ގެންނަވާފައެވެ.