މިރޭ ބޭއްވުމަށް ހަމަޖެހިފައި އޮތް ގައުމީ ޔުނިވާސިޓީގެ ދަސްވެނިވުމުގެ ރަސްމިއްޔާތު މުއްދަތެއް ނެތް ގޮތަށް ފަސްކޮށްފިއެވެ.
މިކަން އަންގާފައިވަނީ އެމްއެންޔޫ ބިޒްނަސް ސްކޫލްގެ ޓުވިޓާ އެކައުންޓުން ކުރި ޓުވީޓަކުންނެވެ. ގްރެޖުއޭޝަން ފަސްކޮށްފައިވާއިރު މާލެއިން ބޭރުގެ ކެމްޕަސްތަކުން ގިނަ އަދަދެއްގެ ދަރިވަރުން ވަނީ، އަމިއްލަ ޚަރަދުގައި ގްރެޖުއޭޝަނަށް މާލެ ގޮސްފައެވެ.
އެމްއެންޔޫ އިން ބުނެފައިވަނީ ގްރެޖުއޭޝަން ފަސްކުރި ނަމަވެސް ސެޓްފިކެޓް ދަރިވަރުންނަށް ދޫކުރާނެ ކަމަށެވެ. ސެޓްފިކެޓު ހޯދުމަށް މާޗް 11 ގެ މެންދުރު 14:00 ގެ ކުރިން ރެޖިސްޓްރާގެ އޮފީހުން ސެޓްފިކެޓު ދޫކުރާނެއެވެ. ސެޓްފިކެޓު ނެގި ނަމަވެސް ގްރެޖުއޭޝަން ދެން ބާއްވާއިރު ވެސް ދަރިވަރުންނަށް ބައިވެރިވެވޭނެއެވެ.
ދަސްވެނިވުމުގައި ބައިވެރިވާން ބޭނުން ނުވާ ކުދިންނަށް ދަރިވަރުންގެ ހިދުމަތްތަކާ ބެހޭ ބައިން ދަސްވެނިވުމަށް ދެއްކި ފައިސާ އަނބުރާ ލިބޭނެ ކަމަށް އެމްއެންޔޫ އިން ބުނެފައިވެއެވެ.
ގްރެޖުއޭޝަން ފަސްކޮށްފައިވަނީ ރާއްޖެއިން ކޮވިޑް-19 ވައިރަސްގެ ދެ ކޭސް ފެނުމާ ގުޅިގެންނެވެ. ކުރެއްދޫ ރިސޯޓުގެ ދެ މުވައްޒަފަކު ވަނީ މިބައްޔަށް ޕޮސިޓިވް ވެ އެކަހެރިކޮށް ފަރުވާކުރަމުންނެވެ.