ރަހުނާއި ނުލައި ކުދި ވިޔަފާރި ކުރިއެރުވުމަށް ހާއްސަ ލޯން ފެސިލިޓީއެއް ބޭންކު އޮފް މޯލްޑިވްސް (ބީއެމްއެލް)އިން މިއަދު ތައާރަފުކޮށްފިއެވެ.
ބީއެމްއެލްއިން ބުނީ ކުދި ވިޔަފާރިތަކަށް އަލަށް ތައާރަފް ކުރި ލޯނަކީ ކުރު މުއްދަތެއްގެ ތެރޭގައި ވިޔަފާރިތައް އިތުރަށް ފުޅާކޮށް ވިޔަފާރި ހިންގުމަށް ބޭނުންވާ ފައިސާ ދޫކުރާ ސްކީމެއް ކަމަށެވެ. މި ފެސިލިޓީގެ ދަށުން ތިން މިލިއަން ރުފިޔާ އާއި ހަމައަށް ލޯނަށް ހުށަހެޅޭނެ ކަމަށް ބޭންކު ވަނީ ބުނެފައެވެ.
ބީއެމްއެލްއިން އިތުރަށް ބުނީ ކުދި ވިޔަފާރިތަކުން ފާއިތުވި ތިން އަހަރު ހޯދާފައިވާ އެވްރެޖް ސޭލްސްގެ 20 ޕަސެންޓާއި ހަމައަށް ލޯނު ލިބޭނެ ކަމަށެވެ. އަދި އެންމެ ގިނަވެގެން ދޫކުރެވޭނީ 3 މިލިއަން ރުފިޔާ އާއި ހަމައަށްކަމަށެވެ. އަދި ލޯން އަދާ ކުރުމަށް 3 އަހަރުގެ މުއްދަތެއް ލިބިގެންދާނެ ކަމަށެވެ.
މި ފެސިލިޓީ ދަށުން ޑިމާންޑް ލޯނާއި، އޯވަރޑްރާފްޓްސް، ބޭންްކް ގެރެންޓީ، ލެޓަރ އޮފް ކްރެޑިޓް އަދި ޓްރަސްޓް ރިސީޕްޓް ޑިމާންޑް ލޯނަށް އެދި ހުށަހެޅޭނެއެވެ.
މިއަދު ތައާރަފް ކުރެވުނު ޕްރޮޑަކްޓް ގެ އިތުރުން ބިޒްނަސް ޑިވަލޮޕްމަންޓް ލޯން، ގެސްޓްހައުސް ލޯން، ރިއަލް އެސްޓޭޓް ލޯން އަދި ރީޓެއިލާސް ލޯން ގެ އިންޓްރެސްޓް / ޕްރޮފިޓް ރޭޓް ވަނީ ދަށްކުރެވިފައެވެ. ލޯނުތަކަށް މި ގެނެވުނު ބަދަލުތައް ބީއެމްއެލް އިސްލާމިކްގެ ޕްރޮޑަކްޓްތަކަށްވެސް ވަނީ ގެނެވިފައެވެ.
މިއަދުގެ ނޫސް ކޮންފަރެންސްގައި ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ ޓިމް ސޯޔަރ ވިދާޅުވީ ބޭންކުން އަލަށް ތައާރަފް ކުރި ފެސިލިޓީ އަކީ އެއްވެސް ރަހުނެއް ނެތި ރާއްޖޭގައި ދޫކުރާ މިފަދަ ފުރަތަަމަ ފެސިލިޓީ ކަމަށެވެ.
" އަޅުގަނޑުމެން ތައާރަފްކުރާ މި ފެސިލިޓީ އަކީ އެއްވެސް ރަހުނަކާ ނުލައި ރާއްޖޭގައި ދޫކުރާ މިފަދަ ފުރުތަމަ ފައިނޭންސިންގ ފެސިލިޓީ. މިއީ ރާއްޖޭގެ ވިޔަފާރިތައް ކުރިއެރުވުމަށް އަޅުގަނޑުމެން ފޯރުކޮށްދެމުންދާ އެހީތެރިކަމުގެ ދަށުން ތައާރަފްކުރެވުނު ފެސިލިޓީއެއް. މިއާއެކު ވިޔަފާރިތަކަށް ބޭނުންވާ އަދި ފުރިހަމަ ބިޒްނަސް ޕްރޮޑަކްޓް ޕޯޓްފޯލިއެއް މި ވަނީ ގާއިމްކުރެވިފަ. ވިޔަފާރި ހިންގުމަށް ބޭނުންވާ ފައިސާ ނުވަތަ ވިޔަފާރި އިތުރަށް ފުޅާކުރުމަށް ބޭނުންވާ ފައިސާ މިހާރު ފަސޭހައިން ހޯދުމަށް މިވަނީ މަގުފަހިވެފަ."
މިއަދުގެ ޕްރެސްގައި ބޭންކުން ވަނީ އެބޭންކުން ދޫކުރާ ހޯމް ކޮންސްޓަރަކްޝަން ލޯނުގެ އިކުއިޓީ 30 ޕަސެންޓުން 20 ޕަސެންޓަށް ދަށްކުރިކަން އިއްލާންކޮށްފައެވެ.
މުޅި ރާއްޖެ ހިމެނޭ ބޭންކިންގ ވިއުގަޔަކާއެކު 20 އަތޮޅުގައި 38 ބްރާންޗް، 51 ސެލްފްސަރވިސް ބޭންކިންގ ސެންޓަރ، 115 އޭޓީއެމް، 277 ކޭޝް އޭޖެންޓުންގެ އިތުރުން އެންމެ ޒަމާނީ އޮންލައިން ބޭންކިންގ ޚިދުމަތާއެކު ބޭންކް އޮފް މޯލްޑިވްސް ގެ އަމާޒަކީ އަމިއްލަ ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުމެވެ.