ވަންޑް އެންޑް އޮންލީ ރީތިރަށް ރިސޯޓުން ކޮރޯނާވައިރަހަށް ޝައްކު ކުރެވިގެން ކަރަންޓީނުކޮށްފައިވާ ކުޑަކުއްޖާ ކޮވިޑް19 އަށް ނެގެޓިވްވެއްޖެއެވެ.
އެކުއްޖާ ނެގެޓިވުމުން އެ ރަށަށް އަރާ ފޭބުން މަނާކޮށްފައި އޮތް އޮތުމަށް ވަނީ ނިމުމެއް ގެނެސް ރަށް ހުޅުވާލައިފައެވެ. މިއާއެކު ލޮކްޑައުންގައި މިހާރު އޮތީ ތިން ރިސޯޓެކެވެ. އެއީ ރާއްޖެއިން އެންމެ ފުރަތަމަ ކޮވިޑް19 ފެނުނު ކުރެއްދޫ އައިލެންޑް ރިސޯޓާއި، ސޭންޑީޒް ބަތަލާ އާއި، ކުރަމަތި އައިލެންޑް ރިސޯޓެވެ.
ރާއްޖެއިން މިހާތަނަށް މި ބައްޔަށް ހަ މީހަކު ވަނީ ޕޮޒިޓިވް ވެފައެވެ. މި ބައްޔަށް ޕޮޒިޓިވްވި ހަ މީހުންނަކީ ކުރެއްދޫ ރިސޯޓުގެ ހަތަރު މީހަކާއި، ބަތަލާ އައިލޭންޑް ރިސޯޓުގައި ތިބި ދެ ފަތުރުވެރިންނެވެ.
ރާއްޖެއިން ހަ މީހެއްގެ ފަރާތުން ކޮރޯނާ ވައިރަސް ފެނިފައިވާތީ ސަރުކާރުން ވަނީ މުޅި ރާއްޖެއަށް ޔެލޯ އެލާޓު ވެސް ނެރެފައެވެ. ޔެލޯ އެލާޓް ނެރެނީ ރާއްޖެއިން ބޭރުން ބަލިޖެހިފައިވާ މީހަކު ރާއްޖެ އަންނަ ހާލަތުގަ އެވެ.