ރާއްޖެއިން ކޮވިޑް19 އަށް މީހުން ޕޮޒިޓިވްވި ޅ. ކުރެއްދޫ ރިސޯޓުގެ ވަކި ސަރަހައްދެއް ބަންދު ކުރުމަށްފަހު އެ ރިސޯޓު ހުޅުވުމަށް މަސައްކަތް ކުރަމުން އަންނަ ކަމަށް ސަރުކާރުން މިއަދު ހާމަކޮށްފިއެވެ.
ކޮރޯނާ ވައިރަހާ ގުޅޭ ސަރުކާރުގެ ތަރުޖަމާނު މަބުރޫކު އަޒީޒު މިއަދު ނޫސްވެރިންނާއި ބައްދަލުކުރައްވާ ވިދާޅުވީ ކުރެއްދޫގައި މިހާރު ޑޮކްޓަރުންގެ ޓީމެއް ހަރަކާތްތެރިވަމުން އަންނަ ކަމަށެވެ. އެގޮތުން އެ ރިސޯޓްގައި މި ވަގުތު ރޫމް އައިސޮލޭޝަންގައި ބަޔަކު އެބަތިބި ކަމަށާއި އެމީހުންގެ ކަންކަން ޑޮކްޓަރުން މޮނީޓާ ކުރަމުންދާ ކަމަށް މަބްރޫކް ވިދާޅުވިއެވެ. އޭނާ ވިދާޅުވީ އައިސޮލޭޝަންގައި ތިބި މީހުންނާއި މެދު ޑޮކްޓަރުން ގޮތެއް ނިންމާނެ ކަމަށެވެ.
އައިސޮލޭޝަންގައި ތިބޭ މީހުން ވަކި ސަރަހައްދަކަށް ގެންގޮސް އެ ސަރަހައްދު ބަންދުކޮށްފައި ބޭއްވުމަށް މަސައްކަތް ކުރަމުންދާ ކަމަށާއި އަދި އެ ސަރަހައްދު އެހެން ބޭއްވުމަށްފަހު ރިސޯޓް އާންމުކޮށް ހުޅުވާލެވޭތޯ ވެސް ބަލަމުންދާ ކަމަށް މަބުރޫކު ވިދާޅުވިއެވެ.
ކުރެއްދޫއިން މި ވައިރަހަށް ޕޮޒިޓިވް ވެފައިވަނީ ހަތަރު ބިދޭސީއެކެވެ. އޭގެތެރޭގައި އެ ރިސޯޓުގައި މަސައްކަތް ކުރާ ދެ ބިދޭސީ މުވައްޒަފުންވެސް ހިމެނެއެވެ. މީގެއިތުރުން ސޭންޑީޒް ބަތަލާ ރިސޯޓުން ދެ މީހަކު ކޮވިޑް19 އަށް ޕޮޒިޓިވް ވެފައިވާއިރު ކުރަމަތި ރިސޯޓުންވެސް މިހާރު ވަނީ ދެ މީހަކު އެއް ބައްޔަށް ޕޮޒިޓިވް ވެފައެވެ. އެއާއެކު ރާއްޖެއިން ޖުމްލަ 8 މީހަކު ވަނީ މި ބައްޔަށް ޕޮޒިޓިވް ވެފައެވެ.