ކޮވިޑް-19 ރާއްޖެއިން އެންމެ ފުރަތަމަ ފެނުނު ކުރެއްދޫ އައިލެންޑް ރިސޯޓު ކަރަންޓީނުން ދޫކޮށް، ރިސޯޓުގައި ތިބި ގެސްޓުން ފުރޭނެ އިންތިޒާމު ހަމަޖައްސަން ފަށައިފިއެވެ.
ވައިރަސްގެ އަލާމާތްތަކެއް ފެނި، ބަންދުކުރި ކުރެއްދޫ ރިސޯޓު އަލުން ހުޅުވާލީ އަލާމާތްތައް ފެނުނު ހުރިހާ އެންމެން ކަރަންޓީނު ކުރުމަށް ގާއިމްކުރެވުނު ރަށަށް ބަދަލުކުރުމަށް ފަހުގައެވެ.
ރިސޯޓު ހުޅުވާފައިވާއިރު އެޗްޕީއޭގެ އޮފިޝަލުން މިހާރުވެސް ރިސޯޓުގައި ހަރަކާތްތެރިވެ، ހާލަތު މޮނީޓާ ކުރަމުން އެބަދެއެވެ. އެކަން ރިސޯޓުގެ ފޭސްބުކް ޕޭޖުން ވަނީ ކަށަވަރުކޮށްދީފައެވެ.
އަދި އިތުރަށް ބުނެފައިވަނީ ރިސޯޓު ބަންދުކުރުމާ ގުޅިގެން ނުފުރި ތިބި ގެސްޓުންނަށް، އެއާލައިންތަކާ ވާހަކަ ދައްކައި ފުރޭނެ އިންތިޒާމު ރިސޯޓުން ހަމަޖައްސަމުން އަންނަ ކަމަށެވެ.
ކުރެއްދޫ އައިލެންޑް ރިސޯޓު ބަންދުކުރީ އެރަށުގައި ޗުއްޓީ ހޭދަކުރި އިޓަލީ ފަތުރުވެރިޔަކު އަނބުރާ ގައުމަށް ގޮސް، ޓެސްޓުކުރުމުން ބައްޔަށް ޕޮސިޓިވްވުމާ ގުޅިގެންނެވެ.
ރާއްޖޭގައި މިހާރު ކޮވިޑް-19 އަށް ޕޮސިޓިވް ވެފައިވާ 8 މީހަކު ވަނީ އެކަހެރިކޮށް ފަރުވާ ދެމުންނެވެ. ސަރުކާރުން ބުނެފައިވަނީ ހުރިހާ އެންމެންގެ ހާލުވެސް އަދި ރަނގަޅު ކަމަށެވެ.