ގއ. ވިލިނގިލީގައި މިއަދު މަރުވި 24 އަހަރުގެ ޒުވާނާގެ މަރުގެ މައްސަލާގައި ހަ މީހަކު ހައްޔަރުކޮށްފިއެވެ.
ފުލުހުން ބުނީ ގއ. އަތޮޅު ހޮސްޕިޓަލަށް ރޭ ފަތިހު 5:00 ހާއިރު ގެންދިޔަ 24 އަހަރުގެ ދިވެހި ފިރިހެނަކު ހޮސްޕިޓަލަށް ގެނައިރުވެސް ނިޔާވެފައިވާ މައްސަލަ ފުލުހަށް ހުށަހަޅާފައިވާ ކަމަށެވެ.
ފުލުހުން ބުނީ މި މައްސަލަ އާއި ގުޅުން ހުރި މީހުން ހައްޔަރު ކުރުމުގެ މަސައްކަތް ފުލުހުން ކުރަމުން އަންނަ ކަމަށެވެ.
ރޭ ފަތިހު ކުއްލި ގޮތަކަށް މަރުވެފައިވާ އޮތްވާ ފެނިފައިވަނީ އެރަށު ހައިޑްޕާކް މުހައްމަދު މުސްޠަފާ (24އ)އެވެ.
ވިލިނގިލިން ވާހަކަ ދެއްކި މީހަކު ބުނީ މި ހާދިސާ އާއި ގުޅިގެން ހަތަރު މީހަކު އެރަށުން ހައްޔަރުކޮށްފައިވާ ކަމަށެވެ. އެމީހުންނަކީ ރޭ މުސްތަފާ އާއި އެކު އުޅުނު މީހުން ކަމަށް އެރަށުން ވާހަކަ ދެއްކި މީހާ ބުންޏެވެ.
މައުލޫމާތު ލިބިފައިވާ ގޮތުގައި މުސްޠަފާ ވިލިނގިލީ ހޮސްޕިޓަލަށް ގެންދިޔައީ އޭނާ އާއި ރޭ އުޅުނު މީހުންނެވެ. އެމީހުން ވަނީ މުސްޠަފާ ހޮސްޕިޓަލަށް ގެންދިއުމަށް ފަހު ފިލައިގެން ގޮސްފައެވެ. މުސްޠަފާ ހޮސްޕިޓަލަށް ގެނައި އިރުވެސް ވަނީ މަރުވެފައިވާ އިރު އެ މައްސަލަ ވލިނިގިލީ ޕޮލިހަށް ހުށަހަޅާފައިވަނީ ހޮސްޕިޓަލްގެ ފަރާތުންނެވެ.
ވިލިނގިލީން ވާހަކަ ދެއްކި މީހާ ބުނީ ރޭ އެމީހުން "ޕާޓީ ކުރުމަށް" ތައްޔާރުވުމުގެ ގޮތުން އެރަށުގައި ހިންގާ "ރެޑްރޯސް ގެސްޓް ހައުސް" އިން ކޮޓަރިއެއް ނަގާފައިވާ ކަމަށާއި، މުސްޠަފާ މަރުވެފައިވަނީ އެ ގެސްޓު ހައުސްގައި ކަމަށެވެ. އަދި ފުލުހުން ގެސްޓު ހައުސް ބަންދުކޮށްފައިވާ ކަމަށް އެމީހާ ބުންޏެވެ.
މި މައްސަލަ ފުލުހުން ތަހްގީގު ކުރަމުން އަންނަ އިރު އިތުރު ތަފްސީލެއް ހާމަ ނުކުރެއެވެ.