އިސްލާމްދީނަށް ފުރައްސާރަކޮށް ދިވެހި ދައުލަތަށް ގޮންޖަހާ ޓްވީޓާގައި ވާހަކަދައްކަމުން އަންނަ މީހާގެ މައްސަލަ ބަލަމުން އަންނަ ކަމަށް ފުލުހުން ބުނެފިއެވެ.
ދީނަށް ފުރައްސާރަކޮށް ޓްވީޓު ކުރަމުން ދަނީ މިދިޔަ އަހަރުވެސް ދީނަށް ފުރައްސާރަކޮށްގެން ފުލުހުން ހައްޔަރުކުރި ގދ. ތިނަދޫ، މުހައްމަދު ރުސްތަމް މުޖުތަބާ ނަމަކަށް ކިޔާ މީހެކެވެ. އޭނާ މިހާރު ހުންނަނީ ދޫކޮށްލާފައެވެ. އޭނާ ދީނަށް ފުރައްސާރަކޮށް ޓްވީޓު ކުރާ މައްސަލައާ ގުޅިގެން ފުލުހުންގެ އޮފިޝަލަކު ވިދާޅުވީ އެ މައްސަލަ ބަލަމުން އަންނަ ކަމަށެވެ.
ފުލުހުން ވަނީ ރުސްތަމް ދޫކޮށްލުމާއި ގުޅޭ ގޮތުން ވެސް ވާހަކަދައްކާފައެވެ. އެގޮތުން ފުލުހުން ބުނީ ދީނަށް ފުރައްސާރަކޮށްގެން ރުސްތަމް ހައްޔަރުކުރީ މިދިޔަ އަހަރުގެ ސެޕްޓެމްބަރު މަހުގެ 10ވަނަ ދުވަހުގައި ކަމަށެވެ. އެ މައްސަލާގެ ތަހުގީގުކޮށް އޭނާގެ މައްޗަށް ދައުވާ ކުރުމަށް އެދި ޕީޖީ އޮފީހަށް ފޮނުވީ އޮކްޓޫބަރު 10 2019 ގައި ކަމަށްވެސް ފުލުހުން ބުންޏެވެ. ފުލުހުން ބުނި ގޮތުގައި ފުލުހުންގެ ހައްޔަރުން އޮކްޓޫބަރު 14، 2019 އިގައި ކަރެކްޝަންގެ ބަދަލު ކުރި ކަމަށާއި އޭނާގެ މައްސަލަ ކޯޓުގައި އޮއްވާ މި މަހުގެ ނުވަ ވަނަ ދުވަހު އޭނާ ބަންދުން ދޫކޮށްލާފައިވާ ކަމަށެވެ.
އޭނާ ދޫކޮށްލީ ތިނަދޫ މެޖިސްޓްރޭޓު ކޯޓުންނެވެ. އަދި އޭނާ ދޫކޮށްލީ ކުރީގެ ގާނޫނެއްގެ ދަށުން ހައްޔަރު ކުރި ކަމަށް ބުނެއެވެ.