މުޅި ދުނިޔޭގައި ހަލުވިކަމާއި އެކު ފެތުރެމުން އަންނަ ކޮވިޑް 19 މިހާރު އެންމެ ބާރަށް ފެތުރޭ އެއް ގައުމަކީ އިޓަލީއެވެ. އިޓަލީގައި މި ބައްޔަށް ޕޮޒިޓުވްވެފައިވާ 17،000އަށް ވުރެ ގިނަ މީހުން ތިބި އިރު ޗައިނާ ފިޔަވައި އެންމެ ގިނަ މީހުން މަރުވެފައިވަނީވެސް އިޓަލީންނެވެ. އިޓަލީން މިހާތަނަށް ބަލި ޖެހިގެން 1266 މީހުން ވަނީ މަރުވެފައެވެ.
އިޓަލީގައި ބަލި ފެތުރެމުން އަންނަ އިރު އެގައުމުގެ ހޮސްޕިޓަލްތަކަށް އަންނަނީ ބާރު ބޮޑުވަމުންނެވެ. އެގޮތުން މިލާނުގައި ހުންނަ އެންމެ ބޮޑު ހޮސްޕިޓަލް ކަމަށްވާ ސާކޯ ހޮސްޕިޓަލުން ވަނީ އެ ހޮސްޕިޓަލްގެ ޖާގަ ފުލްވުމުގެ ބިރުބޮޑުވެފައިވާކަން ހާމަކޮށްފައެވެ.
ސާކޯ ހޮސްޕިޓަލްގެ އިންފެކްޝަން ޑިޒީޒްގެ ވެރިޔާ ޑރ. މަސިމޯ ގަލީ ވިދާޅުވީ އެ ހޮސްޕިޓަލަށް ކޮންމެ 5 މިނިޓަކުން އާ ބަލި މީހަކު ގެންނަ ކަމަށެވެ. އަދި ގެންނަ ބަލި މީހުންގެ ތެރެއިން ބައެއް މީހުން ބެލުމަށްފަހު ދެ ތިން ގަޑިއިރު ތެރޭ ދޫކޮށްލާކަމަށެވެ.
ޑރ. މަސިމޯ ވިދާޅުވީ ބަލި މީހުން ގެންނަ މިންވަރު ކުރިއަށް ހުރި ދުވަސްތަކުގައި އިތުރުވާނެކަމަށް ލަފާ ކުރެވޭ ކަމަށެވެ. އެހެން ކަމުން ބަލި މީހުން ބޭތިއްބުމަށް އިތުރު އިމާރާތްތައް ހޯދަން ޖެހޭނެ ކަމަށެވެ.
އިޓަލީން ކޮވިޑް-19 ޖެހިފައިވާ މީހަކު އެންމެ ފުރަތަމަ ފެނިފައިވަނީ މިއަހަރުގެ ޖެނުއަރީ މަހުގައެވެ. އިޓަލީން ލަފާ ކުރާ ގޮތުގައި އެގައުމަށް ބަލީގެ ޖަރާސީމު އައިސްފައިވަނީ ޖަރުމަނުގެ މިއުނިކްގައި އޮތް ބައްދަލުވުމަކަށް ދިޔަ އެގައުމުގެ މީހަކާއި ޗައިނާއިން ބަލީގެ އަސަރު ހުރި މީހަކާއި ދިމާވެގެންނެވެ. އޭގެ ފަހުން އިޓަލީން އޮތީ ބައްޔަށް ފަރުވާ ކުޑަކުރެވި އަޅާ ނުލެވިއެވެ.
ފާއިތުވި ދެ ހަފްތާގައި އިޓަލީގައި ބަލި ފެތުރިގެން ގޮސްފައިވަނީ އަދަޔާ ހިލާފު ބާރު ސްޕީޑެއްގައެވެ. އަދި ބަލި ކޮންޓްރޯލް ކުރުމަށް އިޓަލީން ވަނީ މުޅި ގައުމު ލޮކް ޑައުންކޮށްފައެވެ.
އިޓަލީން ބަލި ކޮންޓްރޯލް ކުރުމަށް ޗައިނާއިން އަންނަނީ އެހީތެރިވަމުންނެވެ. ނަމަވެސް އަދި މިހާތަނަށް ބަލި ޖެހޭ މީހުންގެ އަދަދު ކޮންޓްރޯލް ނުވެއެވެ. އެގައުމުގައި ބަލީގެ ނުރައްކާ އިންތިހާއަށް ބޮޑުވެފައިވާ އިރު ބަލީގައި ގިނައިން މަރުވަމުން އަންނަނީ އުމުރުން ދުވަސްވީ މީހުންނެވެ.