ގްރޭޑު 10ގެ ދަރިވަރިންގެ ފިލާވަޅުތައް ޕަބްލިކް ސާވިސް މީޑިއާ (ޕީއެސްއެމް) ގެ ޔެސްޓީވީ މެދުވެރިކޮށް މިއަދު ދައްކަން ފަށައިފިއެވެ.
އެޑިއުކޭޝަން މިނިސްޓްރީން މީގެކުރިން ބުނެފައިވަނީ ކޮވިޑް19 ގެ ސަބަބުން ސްކޫލުތަކުގެ ކިޔެވުން އެއް ހަފްތާއަށް މެދުކަނޑާލާފައިވީ ނަމަވެސް ދަރިވަރުންނަށް ފިލާވަޅުތައް ދިނުމުގެ މަސައްކަތް ކުރަމުން އަންނަ ކަމަށެވެ. އެގޮތުންދަރިވަރުންނަށް ފިލާވާޅު ލިބިގެން ދާނީ ޕީއެސްއެމްގެ ޗެނަލްތަކުންނާއި ޔޫޓިއުބު ފަދަ ވަސީލަތްތައް މެދުވެރިކޮށް ކަމަށް އެޑިއުކޭޝަން އިން ބުންޏެވެ.
އެޑިއުކޭޝަނުން ބުނެފައިވާ ގޮތަށް މިއަދު ދައުލަތުގެ މީޑިއާ ޕީއެސްއެމްގެ ޔެސްޓީވީން ވަނީ ގްރޭޑް 10ގެ ދަރިވަރުންގެ ފިލާވަޅުތައް ނަގައި ދިނުމަށް "ޓެލެކިލާސް"ގެ ނަމުގައި ހާއްސަ ޕްރޮގްރާމެއް ފަށާފައެވެ. ޖުމްލަ ހަ މާއްދާގެ ފިލާވަޅުތައް ދޭ މި ޕްރޮގްރާމުގައި ކޮންމެ މާއްދާއަކަށް 30 މިނެޓު ހޭދަ ކުރެއެވެ. ނަގައިދޭ މާއްދާތަކަކީ އިސްލާމާއި އިނގިރޭސި އާއި ހިސާބާއި ކޮމްޕިއުޓާ ސައިންސް އަދި ދިވެހި މާއްދާއެވެ. މެންދުރުފަހު 1:00އިން 2:00 އަށް އިސްލާމް ފޯރަމެއް ކުރިއަށް ގެންދާނެއެވެ.
މިއީ ރާއްޖޭގެ ދަރިވަރުންނަށް އަމާޒުކޮށްގެން މިފަދަ ގޮތަކަށް ކިޔަވައި ދިނުމަށް މަސައްކަތް ކުރާ ފުރަތަމަ ފަހަރުތަކެވެ. މީގެކުރިން މިފަދަ ޕްރޮގްރާމެއް ޕީއެމްއެމް އިން ކުރިން ގެނެސްދިނެވެ. ނަމަވެސް އެއީ މިހާރު ރާއްޖެއަށް ދިމާވެފައިވާ ހާލަތެއް މެދުވެރި ވެގެން ގެނެސްދިން ޕްރޮގްރާމްތަކެއް ނޫނެވެ.