ރާއްޖޭގައިވެސް މިހާރު ފެތުރެމުން އަންނަ ކޮވިޑް19 އާ ގުޅިގެން ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާން ކުރުމުން ސިއްހީ ހުރިހާ މަސައްކަތްތެރިންގެ އެހީތެރިކަަމަށް ސަރުކާރުން ގޮވާލާފައި ވާތީ އެމްޑީޕީން އެފަދަ ވޮލަންޓިއަރުންގެ ލިސްޓެއް ސަރުކާރަށް ހުށަހަޅައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަދި މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވީ ކޮވިޑް-19 އާ ދެކޮޅަށް ސަރުކާރުން ރަނގަޅު ފިޔަވަޅުތަކެއް އަޅަމުން އަންނަ ކަަމަށާއި މި ވަގުތަކީ އެންމެން އެކުގައި މަސައްކަތްކުރަންވީ ވަގުތު ކަަމަށެވެ. އެގޮތުން އާޒިމް ވިދާޅުވީ ސިއްހީ ހިދުމަތްތެރިންގެ އެހީތެރިކަމަށް ސަރުކާރުން ގޮވާލާފައިވުމުން އެމްޑީޕީން އިސްނަގައިގެން އެފަދަ ލިސްޓެއް އެކުލަވާލާފައިވާ ކަމަށާއި އަދި އެ ލިސްޓު މިހާރު ސަރުކާރަށް ހުށަހަޅާފައިވާނެ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ މިދަނޑިވަޅަކީ ކެތްތެރިކަމާ އެކު ސަރުކާރުގެ އެންގުންތަކާ އެއްގޮތަށް އަމަަލުކުރަންވީ ވަގުތު ކަމަށެވެެ. ސިއްހީ ކުއްލި ހާލަތާ ގުޅިގެން ބުރަކޮށް މަސައްކަތްކުރަމުން އަންނަ ޑޮކްޓަރުންނާއި ނަރުހުން އަދި ސިފައިންނަށާއި ފުލުހުންނަށް އޭނާ ޝުކުރު އަދާކުރެއްވި އެވެ.
އެމްޑީޕީން ސަރުކާރަށް ވޮލަންޓިއަރުންގެ ލިސްޓެއް ހުށަހަޅާފައިވާ ކަމަށް އާޒިމް ވިދާޅުވީ ކޮވިޑް-19 ކޮންޓްރޯލް ކުރަން ކުރާ މަސައްކަތައް މަޖިލީހުގެ އާއްމު ކޮމިޓީގެ ބައްދަލުވުމެއް ބާއްވާފައެވެ. އަދި އެ ބައްދަލުވުމުގައި މަޖިލީހުގެ ރައީސްއާ މަޖިލީހުގެ އިސްވެރިންވެސް ވަނީ ބައިވެރިވެވަޑައިގެންފައެވެ.
ދަރުބާރުގޭގައި އިއްޔެ ބޭއްވި ބައްދަލުވުމެއްގައި ވާހަކަދައްކަވަމުން ހެލްތު މިނިސްޓަރު އަބްދުﷲ އަމީން ވިދާޅުވީ މި ވަގުތަކީ ރާއްޖޭގައި ތިބި ހުރިހާ ފަންނީ މީހުނާއި ސިއްހީ ދާއިރާގެ މީހުންގެ އެހީތެރިކަން ގައުމަށް އެންމެ ބޭނުންވާ ވަގުތު ކަމަށާއި އެފަދަ ފަރާތްތައް ގޭގައި ނުތިބެ ހިދުމަތަށް ނިކުތުމަށް ވަރަށް ބޮޑަށް އެދިވަޑައިގަންނަވާ ކަމަށެވެ. އަދި އެހީތެރިކަން ފޯރުކޮށްދޭން ހިދުމަތަށް ނުކުންނަން ބޭނުންވާ ފަރާތްތަކުން ހެލްތު މިނިސްޓްރީގައި ރަޖިސްޓްރީވުމަށް ވެސް މިނިސްޓަރު އެދިވަޑައިގެންނެވިއެވެ.