މުއްދަތެއް ނެތް ގޮތަށް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބު ފަސްކުރަން އިލެކްޝަންސް ކޮމިޝަން (އީސީ) ގެ ފަރާތުން ހައިކޯޓަށް ހުށަހެޅި މައްސަލައިގެ ތެރެއަށް ސިވިލް ސާވިސް ކޮމިޝަން (ސީއެސްސި) އިން ތަދައްހުލުވެއްޖެއެވެ.
ސިވިލް ސާވިސް ކޮމިޝަނުން މިއަދު ނެރެފައިވާ ނޫސްބަޔާނެއްގައި ބުނީ އިލެކްޝަންސް ކޮމިޝަނުން ދިވެހިރާއްޖޭގެ ހައިކޯޓަށް ހުށަހެޅި މައްސަލާގައި އެ ކޮމިޝަނުގެ މުވައްޒަފުންގެ ތެރެއިން ކައުންސިލް އިންތިހާބަށް ކުރިމަތިލުމުގެ ސަބަބުން ކައުންސިލް އިންތިހާބުގެ ގާނޫނާއި ސިވިލް ސާވިސް ގަވާއިދުގެ ދަށުން ސަސްޕެންޑު ކުރެވިފައިވާ މުވައްޒަފުންގެ މަސްލަހަތު ހިމެނޭތީ އިލެކްޝަނުން ހުށަހަޅާފައިވާ މައްސަލައަށް ސީއެސްސީއަށް ތަދައްހުލުވުމަށް ނިންމާފައިވާ ކަމަށެވެ.
ސިވިލް ސާވިސް ކޮމިޝަނުން ބުނީ އެމާއި ގުޅިގެން ބަންޑާރަ ނާއިބުގެ ގާނޫނީ ލަފަޔަކަށް އެދިފައިވާ ކަމަށްވެސް ސީއެސްސީން ބުންޏެވެ.
އިލެކްޝަން ކޮމިޝަންގެ ރައީސް އަހުމަދު ޝަރީފް ވިދާޅުވި ގޮތުގައި ކޮވިޑް19އާ ގުޅިގެން ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާން ކޮށްފައިވާއިރު އިންތިހާބު ބޭއްވޭނެ ހާލަތެއް މިވަގުތު ނެތް ކަމަށެވެ.
އެހެންވެ، މިއަދު އިލެކްޝަން ކޮމިޝަނުން ދުަސްތޫރީ މައްސަލައެއް ހައިކޯޓަށް ހުށަހެޅީއެވެ. އިލެކްޝަނުން ހައިކޯޓުގައި އެދުނީ ރާއްޖޭގައި މިހާރު އޮތް ހާލަތު ރަނގަޅުވެ އާއްމު ހާލަތަކަށް ދިވެހި ގައުމުގެ ހާލަތު ރުޖޫއުވެ އެކަން ސަރުކާރުން ހާމަ ކުރުމުން އިންތިހާބު ބޭއްވުމުގެ އަމުރެއް ނެރެދިނުމަށެވެ. އަދި އޭގެ ފަހުން އިންތިހާބު ބާއްވާނެ ތާރީހެއް ކަނޑައެޅުމުގެ ބާރު އިލެކްޝަން ކޮމިޝަނަށް ދިނުމެވެ.
މުއްދަތެއް ނެތް ގޮތަށް އިންތިހާބުގައި ވޯޓުލުން ފަސްކުރުމަށް އިލެކްޝަން ކޮމިޝަނުން އެދިފައިވީ ނަމަވެސް ޝަރީފް ވިދާޅުވި ގޮތުގައި މީގެކުރިން އިންތިހާބާ ގުޅިގެން ކުރިއަށް ގެންގޮސްފައިވާ އެއްވެސް މަރުހަލާއެއް ބާތިލެއް ނުވާނެއެވެ. އަދި އެ މަރުހަލާތައް އަލުން އިންތިހާބާ ގުޅިގެން ކުރިއަށް ގެންދަން ވެސް ނިންމާފައެއް ނުވެ އެވެ. އޭރަށް އިތުރު ހަރަދުތަކެއް ނުހިނގާނެކަން ޝަރީފް ފާހަގަ ކުރެއްވިއެވެ.
މިދިޔަ ބުރާސްފަތި ދުވަހު ސަރުކާރުން އާއްމު ސިއްހަތުގެ ކުއްލި ނުރައްކަލުގެ ހާލަތު އިއުލާން ކުރުމާއި ގުޅިގެން އިލެކްޝަންސް ކޮމިޝަނުން ވެސް ވަނީ އަންނަ މަހުގެ ހަތަރުވަނަ ދުވަހު ބޭއްވުމަށް ނިންމާފައިވާ އިންތިހާބު އަންނަ މަހުގެ 18ވަނަ ދުވަހަށް ބޭއްވުމަށް ނިންމާފައެވެ.
މުޅި ރާއްޖެއިން ކޮވިޑް19 އަށް 13 މީހަކު ޕޮޒިޓިވް ވެފައިވާއިރު ސަރުކާރުން ވަނީ 30 ދުވަހަށް އާއްމު ސިއްހަތުގެ ކުއްލި ނުރައްކަލުގެ ހާލަތު އިއުލާން ކޮށްފައެވެ.