ދުނިޔޭގައި ހަލުވިކަމާއި އެކުގައި މިހާރު ފެތުރެމުން އަންނަ ކޮވިޑް19 ވައިރަހަށް އަނަންތަރާ ދިގު މޯލްޑިވްސް ރިސޯޓުން ޕޮޒިޓިވްވި ދެ މީހުންގެ ތެރެއިން އެކަކާއި ޑައިރެކްޓު ކޮންޓެކްޓުވި ދިވެއްސެއްގެ ކިބައިން ވައިރަހަށް ޝައްކުވާ އަލާމާތްތަކެއް ފެނިގެން ޓެސްޓު ކުރުމުން އެމީހާ އެ ބައްޔަށް ނެގެޓިވް ވެފައިވާ ކަމަށް ހެލްތު ޕްރޮޓެކްޝަން އޮތޯރިޓީ (އެޗްޕީއޭ) އިން ބުނެފިއެވެ.
އެ ދިވެހި މީހާ އަކީ އެ ރިސޯޓުގެ މުވައްޒަފެއް ކަމަށްވީ ނަމަވެސް، އޭނާ އެންމެފަހުން ހުރީ ހުޅުމާލޭގައި ކަމަށް ސަރުކާރުން ރޭ ވަނީ ހާމަކޮށްފައެވެ. އަދި އަދި ރައްކާތެރިވުމުގެ ފިޔަވަޅެއްގެ ގޮތުން އެ ދިވެހި މީހާ ފަރުކޮޅުފުއްޓަށް ބަދަލުކޮށް ކޮވިޑް-19 އަށް ޓެސްޓް ކުރުމުގެ މަސައްކަތް އިއްޔެ ވަނީ ފަށާފައެވެ.
އެޗްޕީއޭ އިން މިރޭ ވަނީ ހުޅުމާލެއިން ފަރުކޮޅުފުއްޓަށް ގެންގޮސް އެކަހެރި ކުރެވުނު ދިވެހި މީހާގެ ޓެސްޓުގެ ނަތީޖާ ވަނީ ކޯވިޑް19 އަށް "ނެގެޓިވް" ވެފައިވާ ކަމަށް ބުނެފައެވެ.
އަނަންތަރާ ދިގު ރިސޯޓުން މި ބައްޔަށް ދެ މީހަކު ޕޮޒިޓިވް ވެފައިވެއެވެ. އެއީ އެ ރިސޯޓުގައި ޗުއްޓީ ހޭދަކުރަމުންދިޔަ ބިދޭސީ ދެމަފިރިންނެވެ.
ރާއްޖެއިން މިހާތަނަށް 13 މީހަކު ޕޮޒިޓިވް ވެފައިވާއިރު، ސަރުކާރުން މިހާރު ވަނީ ރާއްޖޭގައި 30 ދުވަހަށް ސިއްހީ ކުއްލި ނުރައްކަލުގެ ހާލަތު އިއުލާންކޮށްފައެވެ.