ދުނިޔޭގައި ހަލުވިކަމާއި އެކުގައި މިހާރު ފެތުރެމުން އަންނަ ކޮވިޑް19 ފެތުރިފައިވާ ގައުމެއް ކަމަށްވާ ސައުތު ކޮރެއާއިން އެނބުރި ރާއްޖެ އައި ދިވެއްސަކު ފަރުކޮޅު ފުއްޓަށް ގެންގޮސްފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން ކޮށްފައިވާ ޓްވީޓެއްގައި ބުނީ ސައުތު ކޮރެއާއިން ރާއްޖެ އައި ދިވެއްސެއްގެ ފުށުން ކޮވިޑް19 އަށް ޝައްކުކުރެވޭ އަލާމާތްތައް ހުރުމުން، އެމީހާ އެކަހެރިކޮށް ބަހައްޓައިގެން އިތުރަށް މޮނިޓަރކޮށް، ޓެސްޓު ކުރުމުގެ މަސައްކަތަށް ފަރުކޮޅުފުއްޓަށް ގެންދެވިފައިވާ ކަމަށެވެ.
ސައުތު ކޮރެއާއިން ރާއްޖެއައި މީހެއްގެ ގައިން އަލާމާތްތަކެއް ފެނިގެން ފަރުކޮޅު ފުއްޓަށް ގެންގޮސްފައިވާއިރު ކޮވިޑް-19 ގެ އަލާމާތްތައް ހުރި މީހަކު ވިލިމާލެއިން ފެނިގެން އޭނާ ޓެސްޓު ކުރުމުގެ މަސައްކަތް ކުރަމުން އަންނަ ކަމަށް ވެސް އެޗްޕީއޭއިން މިއަދު ވަނީ ބުނެފައެވެ.
ރާއްޖެއިން މިހާތަނަށް 13 މީހަކު ޕޮޒިޓިވް ވެފައިވާއިރު، ސަރުކާރުން މިހާރު ވަނީ ރާއްޖޭގައި 30 ދުވަހަށް ސިއްހީ ކުއްލި ނުރައްކަލުގެ ހާލަތު އިއުލާންކޮށްފައެވެ. މި ބައްޔަށް މިހާތަނަށް ރާއްޖެއިން ޕޮޒިޓިވްވި އެންމެންނަކީ ވެސް ބިދޭސީންނެވެ.