ވިލިމާލެއިން ކޮވިޑް-19 ގެ އަލާމާތްތަކެއް ފެނުނު ދިވެއްސަކު ކަރަންޓީނުވުމަށް ފަރުކޮޅުފުއްޓަށް ދާން ބުނުމުން އެކަމަށް އެއްބާރުލުން ނުދިން މައްސަލައެއް ޖިނާއީ މައްސަލައެއްގެ ގޮތުގައި ތަހުގީގު ކުރަމުންދާ ކަމަށް ފުލުހުން ބުނެފިއެވެ.
މި މައްސަލައާ ގުޅިގެން ފުލުހުން ބުނީ އެ މީހާއަކީ ސައުތު ކޮރެއާއިން ރާއްޖެއަށް އައިސްފައިވާ ދިވެހި ފިރިހެނެއް ކަމަށެވެ. އަދި ބަލަން ޖެހޭ ކަންކަން ބަލައި ޓެސްޓު ކުރުމަށްޓަކައި ފަރުކޮޅުފުށި އައިސޮލޭޝާން ފެސިލިޓީއަށް ގެންދިއުމަށްޓަކައި، ގޭގައި މަޑުކުރުމަށް އަންގަފައި ވަނިކޮށް އެކަމަށް އެއްބާރުލުނުން ނުދީ، އަންގާފައިވާ ގޮތަށް އަމަލުކޮށްފައި ނުވާ މައްސަލައެއް މިއަދު ފުލުހުންނަށް ހުށަހަޅަފައިވާ ކަމަށެވެ.
ފުލުހުން ވަނީ ވިލިމާލެއަށް ގޮސް އެމީހާ ފުލުހުންގެ ބެލުމުގެ ދަށަށް ގެނެސް ހެލްތް ޕްރޮޓެކްޝަން އޭޖެންސީއަށް މިއަދު މެންދުރުގެ ވަގުތެއްގައި ހަވާލުކޮށްފައެވެ.
ރާއްޖޭގައި ކޮވިޑް19 އަށް ޖުމްލަ 13 މީހަކު ވަނީ ޕޮޒިޓިވްވެފައެވެ. އަދި އެ އެންމެންނަކީ ވެސް ބިދޭސީންނެވެ. ރާއްޖެއިން ކޮވިޑް19 ފެނުމާއި ގުޅިގެންނާއި އަދި އެ ބައްޔަކީ މުޅި ދުނިޔެއަށް ވެސް ކުރިމަތިވެފައިވާ ބަލިމަޑު ކަމެއްގެ ގޮތުގައި ދުނިޔޭގެ ސިއްހަތު ޖަމިއްޔާއިން އިއުލާން ކުރުމާއި އެކު ރާއްޖެއިންވެސް ވަނީ ސިއްހީ ކުއްލި ނުރައްކަލުގެ ހާލަތު އިއުލާން ކޮށްފައެވެ. އެ މުއްދަތު އިއުލާން ކުރީ 30 ދުވަހުގެ މުއްދަތަކަށެވެ.