މެލޭޝިއާ އާއި އިނގިރޭސިވިލާތުގައި ތިބި ދިވެހީން އެއާޕޯޓަށް ނުދިޔުމަށާއި އެ ދެ ގައުމުގައި ތިބި ދިވެހީން ދިރިއުޅޭ އެޕާޓްމަންޓުން ބޭރަށް ނުނިކުމެ ގޭގައި މަޑުކޮށްގެން ތިބުމަކީ އެމީހުންނަށް އޮތް އެންމެ ރައްކާތެރިގޮތް ކަމަށް ސަރުކާރުން ބުނެފިއެވެ.
މިރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮވިޑް19 ގެ ތަރުޖަމާން މަބްރޫކް އަޒީޒް ވިދާޅުވީ، އެންމެ ރިސްކު ބޮޑެތި ގައުމުތަކުގެ ތެރޭގައި ހިމެނޭ މެލޭޝިއާވެސް ލޮކްޑައުން ކޮށްފައިވާ ކަމަށެވެ. އަދި އިނގިރޭސިވިލާތުގެ ހާލަތުވެސް ގޯސްވަމުން ދާ ކަމަށާއި އެ ދެ ގައުމުތަކުގައި މިހާރު އެންމެ ނުރައްކާތެރި ކަމެއްގެ ގޮތުގަ ކުރެވޭނެ ކަމަކީ އެ ގައުމުތަކުގެ އެއާޕޯޓުތަކަށް ދަތުރު ކުރުން ކަމަށެވެ.
މަބްރޫކް ވިދާޅުވީ އެ ގައުމުތަކުގައި ތިއްބެވި ބޭފުޅުންގެ އަމިއްލަ ރައްކާތެރިކަން ކަށަވަރު ކުރުމަށްޓަކައި، މިވަގުތު ކުރެވޭނެ އެންމެ ރަނގަޅު ކަމަކީ އެ ބޭފުޅުން އަމިއްލަ އެޕާޓްމަންޓް ނުވަތަ އަމިއްލަ ގޭގެ މަޑު ކުރުން ކަމަށެވެ. މީގެ އިތުރުން މަބްރޫކް ވިދާޅުވީ އެ ގައުމުތަކުގައި ދިރިއުޅޭ ދިވެހި ރައްޔިތުންނަށް ވާންޖެހޭ އެހީތެރިކަން ދިވެހި ސަރުކާރުން ވަމުންދާނެ ކަމަށެވެ.
ދުނިޔޭގައި ހަލުވިކަމާއެކު ފެތުރެމުން އަންނަ ކޮވިޑް19 އާއި ގުޅިގެން މެލޭޝިއާ އާއި އިނގިރޭސިވިލާތުން ރާއްޖެއަށް މީހުން އައުން ވަނީ މަނާ ކޮށްފައެވެ. މިކަމާއި ގުޅިގެން މަބްރޫކް ވިދާޅުވީ މިއަދު އިރުއޮއްސި ހައެއް ޖެހުމާއެކު މެލޭޝިއާއިން އެއްވެސް ފަރާތަކަށް ރާއްޖެ އައއުންވަނީ މަނާކޮށްފައިވާ ކަމަށާއި، އަދި އިނގިރޭސިވިލާތުން މި މަހުގެ 19 ވަނަ ދުވަހުން ފެށިގެން އެއްވެސް މީހަކަށް ރާއްޖެ އައުން މަނާ ކޮށްފައިވާ ކަމަށެވެ.