ކޮވިޑް19 އަށް ޕޮޒިޓިވް ވެފައިވާ މީހަކާއި ޑައިރެކްޓު ކޮންޓެކްޓުވެފައިވާ ތިން ދިވެއްސެއް ކޮވިޑް19 އަށް ޓެސްޓު ކުރުމުގެ މަސައްކަތް ފަށައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިރޭ ކޮށްފައިވާ ޓްވީޓެއްގައި ބުނީ ޕޮޒިޓިވް ވެފައިވާ ފަރާތަކާއި ޑައިރެކްޓް ކޮންޓެކްޓް ވެފައިވާ 3 ދިވެއްސެއްގެ ފުށުން ކޮވިޑް19 އަށް ޝައްކުކުރެވޭ އަލާމާތްތައް ފެނުމުން، ސާމްޕަލް ނަގައި، ޓެސްޓްކުރުމުގެ މަސައްކަތް ކުރިޔަށްދާ ކަމަށެވެ. އަދި ބުނީ އެ 3 މީހުންވެސް އެކަހެރިކޮށް، މިހާރު ތިބީ ހޯމް އައިސޮލޭޝަންގައި ކަމަށެވެ.
މިރޭ ބޭއްވި ނޫސްވެރިންގެ ބައްދަލުވުމެއްގައި ރައީސް އޮފީހުގެ ކޮމިއުނިކޭޝަން ޑިޕާޓްމަންޓުގެ އަންޑަ ސެކްރެޓަރީ މަބްރޫކް އަބްދުލްއަޒީޒް ވިދާޅުވީ ކޮވިޑް-19 އަށް ޓެސްޓު ކުރުމުގެ ކަންކަން މިހާރު އިތުރަށް ހަރުދަނާކޮށްފައިވާ ކަމަށާއި އެގޮތުން ކިރިޔާ އަލާމާތެއް ހުރި ނަމަވެސް މިހާރު ޓެސްޓު ކުރެވޭނެ ކަމަށެވެ.
އެގޮތުން ހަ ދިވެއްސެއްގެ ކިބައިން ބަލީގެ އަލާމާތްތައް ފެނިގެން ގޭގައި މަޑުކުރުމަށް އެންގިފައިވާ ކަމަށްވެސް މަބްރޫކް ވިދާޅުވިއެވެ. އެ ފަރާތްތަކަކީ:
ސ. ހިތަދޫން ކޮޗިން އިން ދަތުރުކުރި ދިވެއްސެއް، ޅ. ހިންނަވަރުން ލަންކާ އިން ދަތުރުކުރި ދިވެއްސެއް، ދ. ކުޑަހުވަދޫން ޓްވިންޑްރަމް އިން ދަތުރުކުރި ދިވެއްސެއް، އއ. އުކުޅަސް އިން ޓްވިންޑްރަމް އިން ދަތުރުކުރި ދިވެއްސެއް، ރ. ފައިނުން ކޮޗިން އިން ދަތުރުކުރި ދިވެއްސެއް، މާލެ އިން ލަންކާ އިން ދަތުރުކުރި ދިވެއްސެއް، ބެންގަލޫރުން ދަތުރުކުރި ދިވެއްސެކެވެ.
މީގެއިތުރުން އައިލެންޑް ސަފާރީގެ ދެ ޕޮސިޓީވް ކޭސް އާއި ގުޅިގެން ކޮންޓެކްޓް ޓްރޭސިންގެ ތެރެއިން ފާހަގަކުރެވުނު އަލާމާތް ހުރި މީހެއްގެ ސާމްޕްލިންގެ މަސައްކަތް ކުރިއަށްދާ ކަމަށްވެސް މަބްރޫކް ވިދާޅުވިއެވެ.