ކޮވިޑް19އާ ގުޅިގެން ސަރުކާރުގެ އޮފީސްތައް ބަންދުކުރި ނަމަވެސް، އެމްއެމްއޭ އާއި ވިޔަފާރި ބޭންކްތައް ހުޅުވާނެ ކަމަށް މޯލްޑިވްސް މޮނެޓަރީ އޮތޯރިޓީ (އެމްއެމްއޭ) އިން ބުނެފިއެވެ.
އެމްއެމްއޭ އިން ބުނީ އެމްއެމްއޭއާއި ވިޔަފާރި ބޭންކުތައް މިމަހުގެ 19 ވަނަ ދުވަހާއި، 23 އަދި 26 ވަނަ ދުވަހު ހުޅުވާނެ ކަމަށެވެ.
އެމްއެމްއޭއިން ނެރުނު ނޫސްބަޔާނުގަިއ ބުނެފައިވަނީ، މި ތިން ދުވަހު ބޭންކިންގެ ހިދުމަތް ފައިސާ ބަލައި ގަނެ ދޫކުރުމުގެ ހިދުމަތް ލިބޭނީ ހެނދުނު 9:30 އިން ފެށިގެން 11:30 އާއި ހަމައަށެވެ. އަދި ވަކި ލާރި ބަލައިގަނެ ދޫކުރުމުގެ ހިދުމަތް ލިބޭނީ ހެނދުނު 9:30 އިން 11:00 އަށް ކަމަށެވެ.
ކޮވިޑް-19 ގެ ސަބަބުން މާދަމާ އިން ފެށިގެން 26 ގެ ނިޔަލަށް ސަރުކާރުން ބަންދު ކުރަން ސަރުކާރުން ވަނީ ނިންމާފަ އެވެ. ރާއްޖޭގައި މިހާތަނަށް ކޮވިޑް19 އަށް 13 މީހަކު ވަނީ ޕޮޒިޓިވް ވެފައެވެ. އެއާއެކު ރާއްޖޭގެ ސިއްހީ ކުއްލި ނުރައްކަލުގެ ހާލަތުވެސް ވަނީ އިއުލާން ކޮށްފައެވެ.