ކޮވިޑް-19 ގެ އަލާމާތްތަކެއް ފެނިގެން ރަޝިއާގައި ދިވެހި ތިން ދަރިވަރަކު ކަރަންޓީންކޮށްފިއެވެ.
ރައީސް އޮފީހުގެ އަންޑާ ސެކްރެޓަރީ މަބްރޫކް އަޒީޒު ވިދާޅުވީ އެމީހުން ކަރަންޓީން ކުރީ ބަލީގެ އަލާމާތްތައް ފެންނަން ހުރުމުން ފަސް ދުވަހުގެ މުއްދަތަށް ކަމަށެވެ. ނަމަވެސް އެމީހުންގެ ހާލު ރަނގަޅު ކަމަށާއި ރާއްޖޭގެ ކަމާބެހޭ ފަރާތްތަކުން އެ ފަރާތްތަކުގެ ހާލު ބަލަމުންދާ ކަމަށް މަބްރޫކް ވިދާޅުވިއެވެ.
ކޮވިޑް-19 ފެތުރެމުންދާ ނުރައްކާތެރި މިންވަރާއި ގުޅިގެން ގިނަ ގައުމުތަކުގައި ވަނީ ވަރުގަދަ ފިޔަވަޅުތަކެއް އަޅާފައެވެ. އެގޮތުން ރާއްޖެއިން ވެސް މިހާތަނަށް ވަނީ ބައެއް ގައުމުތަކުން މީހުން އައުން ވަގުތީ ގޮތުން މެދުކަނޑާލާފައެވެ.
އަދި ރާއްޖެއިން ބޭރުން އަންނަ ހުރިހާ ދިވެހި ހޯމް އައިސޮލޭޝަނުގައި 14 ދުވަހުގެ މުއްދަތަކަށް ބޭތިއްބުމަށް ވެސް ސަރުކާރުން މިހާރު ވަނީ ނިންމާފައެވެ.
ރާއްޖެއިން މިހާތަނަށް 13 މީހަކު ޕޮޒިޓިވް ވެފައިވާއިރު، ސަރުކާރުން މިހާރު ވަނީ ރާއްޖޭގައި 30 ދުވަހަށް ސިއްހީ ކުއްލި ނުރައްކަލުގެ ހާލަތު އިއުލާންކޮށްފައެވެ.