ދުނިޔޭގައި ހަލުވިކަމާއި އެކު ފެތުރެމުން އަންނަ ކޮވިޑް-19 އިން ސަލާމަތްވުމަށް ރާއްޖެ ހިމެނޭގޮތަށް އޭޝިއާގެ 10 ގައުމަކަށް އެހީތެރިކަން ފޯރުކޮށްދޭނެ ކަމަށް އޭޝިއާގެ އެންމެ ބޮޑު މަހުޖަނު މަޝްހޫރު އަލީބާބާގެ ފައުންޑާ ޖެކްމާ ވިދާޅުވެެއްޖެއެވެ.
ޖެންމާ ކުރެއްވި ޓްވީޓެއްގައި ވިދާޅުވީ ކޮވިޑް-19 އިން ރައްކާތެރިވުމުގެ ގޮތުން ބޭނުންވާ ސާމާން ސަޕްލައިކޮށްދޭނެ ކަމަށެވެ. އެގޮތުން 1.8 މިލިއަން މާސްކާއި، 210000 ޓެސްޓު ކިޓާއި، 36000 ސޫޓުގެ އިތުރުން ވެންޓިލޭޓަރާއި ތާމޯމީޓަރު ސަޕްލައި ކޮށްދިނުމަށް ނިންމާފައިވާ ކަމަށެވެ.
މިތަކެތި ސަޕްލައި ކުރުމަށް ހަމަޖެހިފައިވަނީ ރާއްޖޭގެ އިތުރުން އަވައްޓެރި ލަންކާ އަދި އަފްޢާނިސްތާން، ބަންގުލަދޭޝް، ލާއޯސް، ކެމްބޯޑިއާ، މޮންގޯލިއާ، މިޔަންމާ، އަދި ޕާކިސްތާނަށެވެ.
ޖެކްމާ ވަނީ ކޮވިޑް-19 އަށް ވެކްސިން ހޯދުމަށް ކުރަމުން އަންނަ މަސައްކަތަށްވެސް 14 މިލިއަން ޑޮލަރު ހަދިޔާކޮށްފައެވެ. އަދި ޔޫރަޕްގެ ގައުމުތަކަށްވެސް އެމަޖެންސީ ތަކެތި ވަނީ ފޯރުކޮށްދީފައެވެ.
ޗައިނާގެ ވޫހާންއިން މިދިޔަ ޑިސެމްބަރު މަހު ފެނުނު މި ބަލީގައި މިހާތަނަށް މުޅި ދުނިޔެއިން 11،000އަށް ވުރެ ގިނަ މީހުން މަރުވެފައިވާ އިރު ދިނިޔޭގެ އެކިކަންކޮޅުތަކުގައި ބަލި ޖެހިފައިވާ މީހުންގެ އަދަދު 250،000 އަށް ވުރެ ވަނީ މަތިވެފައެވެ.
މި ބަލި ޗައިނާއިން ކޮންޓްރޯލް ކުރެވިފައިވާ އިރު މި ބަލި މިހާރު އެންމެ ބާރަށް ފެތުރެމުން އަންނަނީ ޔޫރަޕްގައެވެ. އެގޮތުން އިޓަލީއަކީ މިވަގުތު މުޅި ދުނިޔޭގައިވެސް މި ބަލި އެންމެ ހަލުވިކޮށް ފެތުރެމުން އަންނަ ގައުމެވެ.