ސޭންޑިޒް ބަތަލާ ރިސޯޓުން ކޮވިޑް19 އަށް ޝައްކު ކުރެވޭ އިތުރު މީހަކު ޓެސްޓު ކުރަމުންދާ ކަމަށް ކޮވިޑް19 ގެ ތަރުޖަމާން މަބްރޫކް އަޒީޒް ވިދާޅުވެއްޖެ އެވެ.
ދަރުބާރުގޭގައި ކުރިއަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮވިޑް19 ގެ ތަރުޖަމާން މަބްރޫކް ވިދާޅުވީ، ބަތަލާ ރިސޯޓުން އިތުރު މީހަކު ކޮވިޑް19 އަށް ޓެސްޓު ކުރަމުންދާ ކަމަށާއި، އެ ރިސޯޓު އަނެއްކާވެސް މޮނީޓަރިންގެ ހާލަތަށް ލެވިފައިވާ ކަމަށެވެ.
ބަތަލާ ރިސޯޓުން އިތުރު މީހަކު ޓެސްޓު ކުރަމުން އަންނައިރު އެ ރިސޯޓުން މީގެކުރިން ދެ މީހަކު ކޮވިޑް19 އަށް ޕޮޒިޓިވްވިއެވެ. ނަމަވެސް ސަރުކާރުން ރޭ ވަނީ އެ ދެ މީހުންވެސް ބަލިން ރަނގަޅުވެފައިވާ ކަމަށާއި ނަމަވެސް އޮންނަ އުސޫލުގެ ދަށުން މޮނީޓާ ކުރަމުން އަންނަ ކަމަށް ބުނެފައެވެ. މީގެއިތުރުން ކުރެއްދޫ އައިލެންޑުން ކޮވިޑް19 އަށް ޕޮޒިޓިވްވި މީހުންގެ ތެރެއިން އެކަކު ރަނގަޅުވެފައިވާ ކަމަށް މިއަދު ސަރުކާރުން ވަނީ ހާމަކޮށްފައެވެ.