ކޮވިޑް-19 އިން ރައްކާތެރިވުމުގެ ގޮތުން މާލޭގެ މަގުތައް ކޮލޮރިން އަޅައިގެން ދޮވެ ސާފު ކުރުމުގެ މަސައްކަތް ފަށައިފިއެވެ.
މާލެ ސިޓީ ކައުންސިލާއި، އެމްއެންޑީއެފް ގުޅިގެން މާލޭގެ މަގުތައް ދޮވެ ސާފު ކުރުމުގެ މަސައްކަތް ފަށާފައިވަނީ މިއަދު ހެނދުނު އައިޖީއެމްއެޗް ކައިރިންނެވެ.
މަސައްކަތް ރަސްމީކޮށާް ފެށުމުގެ ކުރިން އައިޖީއެމްއެޗް ސަރަހައްދުގައި ނޫސްވެރިންނާއި ވާހަކަ ދައްކަވަމުން މާލޭގެ މޭޔަރ ޝިފާ މުހައްމަދު ވިދާޅުވީ މާލޭގެ މަގުތައް ސާފު ކުރުމަށް މާލެ ވަށައިގެންވާ ރިންގު ރޯޑާއި ގޯޅިތައް ކްލޯރިން ފެނުން ސާފު ކުރާނެ ކަމަށެވެ.
މީގެ އިތުރުން މާލޭގެ އެކިތަންތަނަށް ޖަމާކޮށްފައިވާ ކުނިތައް ނެގުމާއި، މަގުމަތީގައި އަޅާފައިވާ ޕެލެޓު ފަދަ ތަކެތި ނަގައި ސާފު ކުރާނެ ކަމަށެވެ.
ޝިފާ ވިދާޅުވީ މާލެ ސާފުކުރުމަށް ކުރަމުންދާ މަސައްކަތަށް އާއްމުންގެ އެއްބާރުލުން ބޭނުންވާ ކަމަށެވެ. އެގޮތުން މަގުމައްޗަށް ކުޅު ނުޖެހުމާއި، ނޭފަތް ފޮޅުން ފަދަ ހަޑި އާދަތައް ހުއްޓާލުމަށް ޝިފާ ވިދާޅުވިއެވެ.
ޝިފާ އިތުރަށް ވިދާޅުވީ މަގުތައް ސާފުކުރުމަށް ބޭނުންކުރާ ކްލޮރިން ފެން ޖެހިގެން އެއްވެސް މީހަކަށް އަދި އެއްޗަކަށް ގެއްލުމެއް ނުވާނެ ކަމަށެވެ
މި މަސައްކަތުގައި އެމްއެންޑީއެފް ފަޔާ އެންޑު ރެސްކިއު ސާވިސްގެ ވެހިކަލްތައް ދަނީ ހަރަކާތްތެރިވަމުންނެވެ.