ކޮވިޑް19 އަށް ރާއްޖެއިން ޕޮޒިޓިވްވި މީހުންގެ ތެރެއިން އިތުރު ދެ މީހަކު އެ ބަލިން ރަނގަޅުވެފައިވާ ކަމަށް ސަރުކާރުން ބުނެފިއެވެ.
ސަރުކާރުން މިއަދު ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި އައިޖީއެމްއެޗުގެ ޑޮކްޓަރުންގެ ޓީމުން ވިދާޅުވީ ރާއްޖެއިން މުޅި ޖުމްލަ 13 މީހަކު ކޮވިޑް19 އަށް ޕޮޒިޓިވްވެފައިވާއިރު އޭގެތެރެއިން ތިން މީހަކު މީގެކުރިން ރަނގަޅުވެފައިވާ ކަމަށެވެ. އަދި ވިދާޅުވީ އިތުރު ދެ މީހަކު މިއަދު އެ ބަލިން ރަނގަޅުވެފައިވާ ކަމަށެވެ. އެހެންކަމުން މުޅި ޖުމްލަ ރާއްޖެއިން ކޮވިޑް19 އަށް ޖެހުނު މީހުންގެ ތެރެއިން ފަސް މީހަކު މިވަނީ ރަނގަޅުވެފައެވެ.
ކޮވިޑް19 ގެ މައުލޫމާތު ދިނުމަށް ސަރުކާރުން ކަނޑައަޅާފައިވާ ތަރުޖަމާން މަބްރޫކް އަޒީޒް މިއަދު ވިދާޅުވީ މިހާތަނަށް ކޮވިޑް19 އާ ގުޅިގެން 673 ސާމްޕަލް ނަގާފައިވާ ކަމަށާއި އޭގެތެރެއިން 660 ސާމްޕަލް ނެގެޓިވްވެފައިވާ ކަމަށެވެ. މަބްރޫކް ވިދާޅުވީ ކަރަންޓީން ފެސިލިޓީތަކުގައި 496 މީހަކު އެބަތިބި ކަމަށެވެ.
ރާއްޖެއިން ކޮވިޑް19 އަށް ޕޮޒިޓިވްވި މީހުންގެ ތެރެއިން މިހާތަނަށް ބަލިން ރަނގަޅުވެފައިވާ މީހުންގެ ތެރެއިން، ސޭންޑީޒް ބަތަލާ ރިސޯޓުން އެ ބައްޔަށް ޕޮޒިޓިވްވެފައިވާ ދެމަފިރިންނާއި، މި ބައްޔަށް އެންމެ ގިނަ މީހުން ޕޮޒިޓިވްވި ކުރެއްދޫ އައިލެންޑު ރިސޯޓުގެ މީހަކު ހިމެނެއެވެ.