އައްޑޫ ސިޓީގެ ހުރިހާ މިސްކިތަކަށް ލޮޓަސް ފިހާރައިން ހޭންޑްވޮޝް ފުޅިތަކެއް ހަދިޔާ ކޮށްފިއެވެ.
ފޭދޫ ދާއިރާގެ މެންބަރު މުހައްމަދު ނިހާދު ވިދާޅުވީ އައްޑޫ ރައްޔިތުންގެ ނަމުގައި ލޮޓަސް ފިހާރައިން ވެދިން ދީލަތި އެހީއަށް ޝުކުރު ދަންނަވާ ކަމަށެވެ. އޭނާ ވިދާޅުވީ އައްޑޫ ސިޓީގެ ހުރިހާ މިސްކިތަކަށް ލޮޓަސް ފިހާރައިން ހަދިޔާ ކުރި ހޭންޑް ވޮޝް ފުޅި ކޭސްތައް "އާގަލާ ކުއީން" އަށް އަރުވާފައިވާ ކަމަށެވެ.
ނުރައްކާތެރި ކޮވިޑް19 ރާއްޖެއިން ވެސް ފެނިފައިވާއިރު މިކަމުން ސަލާމަތްވުމުގެ ގޮތުން ގިނައިން އަތް ދޮވުމަށް ސިއްހީ މާހިރުން އަންނަނީ ގޮވާލަމުންނެވެ.
ކޮވިޑް19 އާ ގުޅިގެން ބައެއް ވިޔަފާރިތަކުން ތަކެތީގެ އަގު ބޮޑުކޮށްފައިވީ ނަމަވެސް ލޮޓަސް ފިހާރައިން މީގެކުރިން ބުނެފައިވަނީ އެ ކުންފުނިން ވިއްކަމުންދާ ކާބޯތަކެތި އަގުބޮޑު ނުކުރާނެ ކަމަށެވެ. ލޮޓަސް ފިހާރައިން ބުނީ ރާއްޖެއިން ބޭރުން މުދަލުގެ އަގުބޮޑު ނުވާހާ ހިނދަކު ލޮޓަސް ފިހާރައިން ގެންނަ އެއްވެސް މުދަލެއް އަގު ބޮޑު ނުކުރާނެ ކަމަށެވެ. އަދި 100 ޕަސެންޓުގެ އިތުބާރު "އެންޓަބެކްސް" ހޭންޑުވޮޝް ގަނޑުކޮށް ވިޔަފާރިވެރިންނަށް ނުވިއްކާނެ ކަމަށާއި އާއްމުންނަށް ވަކިން ހޭންޑްވޮޝް ފުޅި ވިއްކާނެ ކަމަށް ލޮޓަސްއިން ބުންޏެވެ.