އަންނަ ހަފުތާއިން ފެށިގެން މަޖިލީހުގެ މެންބަރުން ގޭގައި ތިއްބަވައިގެން އިންޓަނެޓް މެދުވެރިކޮށް މަސައްކަތްތައް ކުރާ ގޮތަށް ނިންމައިފިއެވެ.
ރައްޔިތުންގެ މަޖިލީހުން ކުރި ޓުވީޓެއްގައި ބުނީ އަންނަ ހަފުތާއިން ފެށިގެން މަޖިލީހުގެ މަސައްކަތްތައް މެންބަރުން ގޭގައި ތިއްބަވައިގެން އިންޓަނެޓް މެދުވެރިކޮށް ކުރިއަށް ގެންދިއުމަށް ނިންމަވާފައިވާ ކަމަށެވެ.
މަޖިލީހުގެ ޖަލްސާތައް އޮންލައިންކޮށް ކުރިއަށް ދާނީ މައިކްރޯސޮފްޓް ޓީމްސް ބޭނުން ކޮށްގެން ކަމަށާއި މެންބަރުން ބޭނުން ކުރައްވާނީ އެބޭފުޅުންގެ ރަސްމީ އީމެއިލް އެޑްރެސް ކަމަށް މަޖިލީހުން ބުނެއެވެ. އަދި އެ ޖަލްސާތަކުގެ ލައިވް ފީޑް މީޑިއާއަށް ލިބޭނެ އިންތިޒާމް ހަމަޖައްސަމުން ގެންދާ ކަމަށް މަޖިލިސް އިދާރާއިން ބުނެއެވެ.
އެންމެ ފަހުން މަޖިލީހުގެ ޖަލްސާ އެއް ބާއްވާފައި ވަނީ މިދިޔަ ހަފްތާގެ ހޯމަ ދުވަހުއެވެ. އެ ދުވަހުގެ ޖަލްސާގައި މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ މިފަދަ ހައްސާސް ދަނޑިވަޅެއްގައި މަޖިލީހުގެ ޖަލްސާތައް ނުބާއްވާ މަޖިލިސް ބަންދު ނުކުރެވޭނެ ކަމަށެވެ. އެހެންކަމުން ކޮންމެހެން ބާއްވަންޖެހޭ ޖަލްސާތައް ބާއްވާނެ ކަމަށް އެމަނިކުފާނު ވިދާޅުވިއެވެ.
ރައްޔިތުންގެ މަޖިލިސް މެދުކަނޑާލާފައިވާއިރު ކޮވިޑް19 އިން ރައްކާތެރިވުމުގެ ގޮތުން މިދިޔަ ބުރާސްފަތި ދުވަހުން ފެށިގެން މި ހަފްތާގެ ބުރާސްފަތި ދުވަހުގެ ނިޔަލަށް ސަރުކާރު ވަނީ ބަންދުކޮށްފައެވެ.