ހުޅުލޭ އައިލެންޑް ހޮޓެލް (އެޗްއައިއެޗް) ގައި ކަރަންޓީނުކޮށްފައި ތިބި މީހުން އެހެން ފެސިލިޓީތަަކަށް ބަދަލުކުރުމުގެ މަސައްކަތް ފަށާފައިވާކަމަށް ސަރުކާރުން ހާމަކޮށްފިއެވެ.
ދަރުބާރުގޭގައި މިއަދު މެންދުރު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮވިޑް19 ގެ މައުލޫމާތު ދިނުމަށް ސަރުކާރުން ކަނޑައަޅާފައިވާ ތަރުޖަމާން މަބްރޫކް އަޒީޒް ވިދާޅުވީ އެތަނުގައި ތިބި މީހުން އެހެން ފެސިލިޓީތަކަށް ބަދަލު ކުރުމުގެ މަސައްކަތް ކުރަނީ އެތަން އައިސޮލޭޝަން ފެސިލިޓީއަކަށް ހެދުމުގެ ވިސްނުމުގައި ކަމަށެވެ.
މަބްރޫކް ވިދާޅުވީ މިވަގުތު ކަރަންޓީނުގެ އެކި ފެސިލިޓީތަކުގައި 574 މީހުން ތިބިއިރު އައިސޮލޭޝަންގައި 19 މީހަކު އެބަތިބި ކަމަށެވެ. މަބްރޫކް ވިދާޅުވީ ސަރުކާރުގެ ވިސްނުމަކީ، ދިގު މުއްދަތަކަށް ބޭސް ކުރާ ފަރާތްތަކާއި، އުމުރުން ދުވަސްވީ މީހުންނާއި ކުޑަކުދިން މާލެއާ ވީހާވެސް ކައިރިން ބެލެހެއްޓުން ކަމަށެވެ.
ކަރަންޓީން ފެސިލިޓީތަކުގެ ގޮތުގައި ސަރުކާރުން މިހާރު ބޭނުން ކުރަމުން އަންނަނީ ރިސޯޓުތަކެވެ. އެ ރިސޯޓުތަކަކީ މިވަގުތަށް ބަންދު ކޮށްފައި ސަރުކާރަށް ހަވާލުކޮށްފައި ހުރި ރިސޯޓުތަކެކެވެ. އެ ރިސޯޓުތަކަށް ސަރުކާރުން އެއްވެސް ކުއްޔެއް ދައްކަން ނުޖެހޭއިރު މިފަދަ ކުއްލި ނުރައްކަލެއްގެ ހާލަތުގައި ސަރުކާރުން ބޭނުންވެއްޖެެ ހިނދެއްގައި ރިސޯޓުތައް ސަރުކާރަށް ލިބޭނެ ކަމަށް މަބްރޫކް ވިދާޅުވިއެވެ. އޭނާ ވިދާޅުވީ ސަރުކާރުން ރިސޯޓުތައް ހެދުމަށް ރަށެއް ކުއްޔަށް ދޭއިރުގައި ހަދާ އެގްރީމަންޓުގައި އެގޮތަށް ބަޔާންކޮށްފައިވާ ކަމަށެވެ.
ރާއްޖެއިން މިހާތަނަށް ކޮވިޑް-19 އަށް ޕޮޒިޓިވް 13 މީހަކު ފެނިފައިިވާއިރު، އޭގެ ތެރެއިން ފަސް މީހަކު ވަނީ ބަލިން މުޅިން ރަނގަޅުވެފައެވެ.