ކުރުގާ ފުޓްސަލްގައި ރޭ ހިތަދޫ މަލްޓި ޖީނިއަސް އާއި ކެންޑާ އެފްސީ ބައްދަލު ކުރި މެޗް 3-3 ލަނޑުން އެއްވަރުވެ މަލްޓި ޖީނިއަސް ކުއާޓަރ ފައިނަލަށް ދަތުރުކޮށްފިއެވެ.
ރޭގެ މެޗްގެ ފުރަތަމަ ލަނޑު ޖެހީ ކެންޑާ އެފްސީންނެވެ. އެ ލަނޑު ޖެހީ ޝާޔާޒުއެވެ. އަދި ކެންޑާއިން ވަނި 2 ވަނަ ގޯލެއް ވެސް ޖަހާފައެވެ. އެ ލަނޑު ޔާސިރު މުހައްމަދު ކާމިޔާބްކޮށްދިން އިރު ފަހު ލަނޑުވެސް ކާމިޔާބު ކުރީ ޝަޔާޒުއެވެ.
މަލްޓި ޖީނިއަސްގެ ފުރަތަމަ ލަނޑު ޖެހީ ބޮންޑާއެވެ. އަދި ދެވަނަ ލަނޑު އިބްރާހިމް ޝަނީޒް ކާމިޔާބް ކޮށްދިން އިރު ފަހު ލަނޑު ޖެހީ އަލީ އަޒުވަރުއެވެ. މޮޅު ކުޅުންތެރިއަކީ ބޮންޑާއެވެ.
ރޭ ގްރޫޕް އޭގެ އެފްވައިސީ އާއި ފްރެންޑްސް ކްލަބް ކުޅުނު މެޗް 1-0 ލަނޑުން ކާމިޔާބް ކުރީ އެފްވައިސީއެވެ. އެފްވައިސީގެ ހަމައެކަނި ލަނޑު ޖަހައިދިނީ ހުސެއިން ޣައްސަމް ލަބީބްއެވެ. މޮޅު ކުޅުންތެރިއަކީ އެފްވައިސީގެ އަލީ ޝިފާއުއެވެ. މި ގްރޫޕުން މި ދެޓީމްވެސް ވަނީ ކުއާޓާއަށް ގޮސްފައެވެ.
ރޭގެ ފަހު މެޗްގައި ހަބޭސް އަދި ޔުނިއަން ސްޕޯޓްސް ބައްދަލު ކުރި މެޗް 6-1 ލަނޑުން ކާމިޔާބް ކުރީ ހަބޭސްއެވެ.
މިރޭ މި މުބާރާތުގެ އެންމެ ފަހު ގްރޫޕް މެޗްތައް ކުޅޭނެއެވެ. އެގޮތުން ފުރަތަމަ މެޗްގައި ޝަންގްރިއްލާ އަދި ޓީއެފްޓީއެވެ. ދެވަނަ މެޗްގައި ބައްދަލު ކުރާނީ ޒިލޯން އަދި ރެސްކިއުއެވެ.
ކުއާޓަރ ފައިނަލް މެޗްތައް ކުޅޭނީ 31 ޖުލައި ދުވަހުގެ ރެއެވެ.