ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ތަރައްގީ ކޮށްފައިވާ އާ އޭޕްރަންގެ ދެވަނަ ފިޔަވަހީގެ މަސައްކަތް ވެސް ނިންމާލައިފިއެވެ. މި އޭޕްރަން އަކީ ވީއައިއޭގެ ހުޅަނގު ފަރާތުގައި ތަރައްގީ ކޮށްފައިވާ އޭޕްރަން އެކެވެ.
ވީއައިއޭ ހިންގާ ކުންފުނި، މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން ބުނީ އެ އޭޕްރަންގެ ބޮޑު މިނުގައި 25،500 އަކަ މީޓަރު ހުންނާނެ ކަމަށެވެ. އަދި އެތާނގައި ހަތަރު ވައިޑް ބޮޑީ އެއާކްރާފްޓް ޕާކު ކުރެވޭނެ ކަމަށް އެމްއޭސީއެލް އިން ބުންޏެވެ.
އާ އޭޕްރަންގެ ފުރަތަމަ ފިޔަވަހީގެ މަސައްކަތް ނިންމާ އޭޕްރަން ހުޅުވީ މިދިޔަ އަހަރުގެ ޖުލައި މަހުގެ 17ވަނަ ދުވަހުއެވެ. އިނާގެ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) ކުންފުނިން ތަރައްގީ ކުރި، ސައުތު ވެސްޓް އެޕްރަން ރަސްމީކޮށް ހުޅުވުމުގެ ގޮތުން ފުރަތަމަ މިތަނުގައި ޕާކް ކުރީ ގައުމީ އެއާލައިން މޯލްޑިވިއަންގެ ފްލައިޓެކެވެ.
ފުރަތަމަ ފިޔަވަހީގައި 70،000 އަކަމީޓަރު ހުރެ އެވެ. މިތަނުގައި ދެ ސައިޒެއްގެ މަތިންދާ ބޯޓު ޕާކު ކުރެވޭނެ އެވެ. އޮޕްޝަން އެއްކެއްގައި ދެ ވައިޑް ބޮޑީ އެއާ ކްރާފްޓާއި ހަތް ނެރޯ ބޮޑީ އެއާ ކްރާފްޓް ބޭއްވޭނެ އެވެ. އަދި ދެވަނަ އޮޕްޝަންގައި ފަސް ވައިޑް ބޮޑީ އެއާކްރާފްޓާއި އެއް ނެރޯބޮޑީ އެއާކްރާފް ބޭއްވެއެވެ.
އާ އޭޕްރަން ހަދާފައިވަނީ މަތިންދާ ބޯޓަށް ފަސޭހަކަމާއެކު ތެޔޮ އަޅާލެވޭ ގޮތަށެވެ. މިހާރު ތެޔޮ ލޮރީ ބޯޓަށް ތެޔޮ އެޅިނަމަވެސް ފިއުލް ސިސްޓަމްގެ މަސައްކަތް ނިމުމުން އޭޕްރަންގައި އޮންނަ ބޯޓު ފަހަރަށް ތެޔޮ ވިއުގައެއް މެދުވެރިކޮށް ތެޔޮ އެޅޭނެއެވެ. އެ ނިޒާމު ގާއިމް ކުރަން އެއާޕޯޓުގެ އަޑީގައި ވަނީ ތެޔޮ އޮޅި އަޅާފަ އެވެ. އަލަށް ހަދަމުން ގެންދާ ފިއުލްފާމް އިން މިތަނަށް ތެޔޮ ފޯރުކޮށްދޭނެއެވެ.