އިނގިރޭސިވިލާތުގައި ދިރިއުޅޭ ދިވެހި ޑޮކްޓަރެއްގެ އަންހެނުން ނުރައްކާތެރި ކޮވިޑް-19 އަށް ޕޮޒިޓިވް ވެއްޖެއެވެެ.
އިނގިރޭސިވިލާތަކީ ވަރަށް ހަލުވިކަމާއި އެކުގައި މި ވައިރަސް ފެތުރެމުން އަންނަ ގައުމެކެވެ. އެގައުމުން މިހާތަނަށް 14 ހާހަށްވުރެ ގިނަ މީހުން އެ ބަލި ޖެހިފައިވާއިރު އެގައުމުގެ ބޮޑުވަޒީރަށް ވެސް މިހާރު ވަނީ އެ ބަލި ޖެހިފައެވެ. މީގެއިތުރުން އިނގިރޭސިވިލާތުގައި 700އަށްވުރެ ގިނަ މީހުން ވަނީ އެބަލީގައި މަރުވެސް ވެފައެވެ.
މަދުން ނަމަވެސް ދިވެހިން ދިރިއުޅޭ އެ ގައުމުގައި ދިރިއުޅެމުން އަންނަ ދިވެހި ޑޮކްޓަރު އޭނާގެ ފޭސްބުކްގައި ކޮށްފައިވާ ޕޯސްޓެއްގައި ވިދާޅުވީ އޭނާގެ އަންހެނުން ރޯގާ ޖެހިފައިވާ ކަމަށާއި އަދި ޑޮކްޓަރަށް ދެއްކުމުން ކޮވިޑް19 އަށް ޕޮޒިޓިވްވެފައިވާކަން އެނގުނު ކަމަށެވެ.
ޑޮކްޓަރު ވިދާޅުވީ ވޭތުވެދިޔަ ދެ ހަފްތާގައި އޭނާ އުޅުއްވީ ކޮވިޑް19 ޖެހިފައިވާ ފަރާތްތަކަށް ފަރުވާ ކުރުމުގައި ކަމަށާއި އެހެންކަމުން ގެއަށް އެ ވައިރަސް ގެނައީ އޭނާކަން ޔަގީން ކަމަށެވެ. އަދި މިހާރު ޑޮކްޓަރު ވަނީ އޭނާގެ ގައިންވެސް ވެސް ކޮވިޑް19 ގެ އަލާމާތްތަކެއް ހުރި ކަމަށް ވިދާޅުވެފައެވެ. ނަމަވެސް ޓެސްޓު ހެދި ކަމަށް ނުވަތަ ނޫން ކަމެއް ނޭނގެއެވެ.
މިވަގުތު ޑޮކްޓަރު އުޅެނީ ގޭގައި އެކަހެރިވެގެންނެވެ. ޑޮކްޓަރުގެ ވާހަކައިން އެ ދެމީހުންގެ ދަރިފުޅުގެ ގައިންވެސް ކޮވިޑް19 ގެ އަލާމާތްތަކެއް ވަނީ ފެންނަން ފަށާފައެވެ. ނަމަވެސް ދަރިފުޅުގެ ހާލަތު ރަނގަޅު ކަމަށްވެއެވެ.
ޔޫކޭގައި ދިިރިއުޅޭ ދިވެއްސަކަށް ކޮވިޑް19 ޖެހިފައިވާއިރު އެގައުމުން ރާއްޖެ އައިސް ކަރަންޓީންގައި ހުރި ދިވެއްސަކަށްވެސް ވަނީ އެބަލި ޖެހިފައެވެ.