ދުނިޔޭގައި ހަލުވިކަމާއި އެކުގައި ފެތުރެމުން އަންނަ ކޮވިޑް19 ވައިރަސް އަށް އިތުރު ދިވެއްސަކު ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ކޮށްފައިވާ ޓްވީޓެއްގައި ބުނީ އެމީހާއަކީ އިނގިރޭސިވިލާތުން ރާއްޖެ އައި މީހެއް ކަމަށާއި އަދި އެމީހާ ކަރަންޓީން ކޮށްފައި ހުރީ ރޯޔަލް އައިލެންޑު ރިސޯޓުގައި ކަމަށެވެ. އަދި އޭނާ އެ ބައްޔަށް ޕޮޒިޓިވް ވެފައިވާ ކަމަށް ބުންޏެވެ. މިއީ ރާއްޖެއިން ދިވެއްސަކު ކޮވިޑް19 އަށް ޕޮޒިޓިވްވި ދެވަނަ ފަހަރެވެ.
އެންމެ ފުރަތަމަ ދިވެއްސަކަށް ކޮވިޑް19 ޖެހުނީ ވެސް އިނގިރޭސިވިލާތުން އައިސް ކަރަންޓީންގައި ހުރި ދިވެއްސަކަށެވެ. އެހެންކަމުން މުޅި ޖުމްލަ ރާއްޖެއިން ކޮވިޑް19 ޖެހުނު މީހުންގެ އަދަދު މިއަދު މިވަނީ 17 އަށް އަރާފައެވެ. އަދި ބަލިން 11 މީހަކު ވަނީ ރަނގަޅުވެފައެވެ.
މިހާތަނަށް މި ބައްޔަށް ފަރުވާ ދެމުން ދަނީ ޖުމްލަ ހަަތަރު މީހަކަށެވެ. އެއީ ދެ ދިވެހިންނާއި ދެ ބިދޭސީންނަށެވެ. ރާއްޖެއިން ކޮވިޑް19 ފެނިފައިވުމާއި ގުޅިގެން ގިނަ ފިޔަވަޅުތަކެއް ސަރުކާރުން ވަނީ އަޅާފައެވެ. އެގޮތުން ފަތުރުވެރިންނަށް ނާދެވޭނެ ގޮތަށް ރާއްޖޭގެ ބޯޑަރު ބަންދު ކޮށްފައިވާއިރު ސަރުކާރު ވެސް ވަނީ ދެ ހަފްތާއަށް ބަންދުކޮށްފައެވެ.
މީގެއިތުރުން މާލެ ސަރަހައްދުގެ ކެފޭ އަދި ރެސްޓޯރެންޓު ފަދަ ތަންތަން ބަންދު ކޮށްފައިވާއިރު 30 ދުވަހުގެ މުއްދަތަށް ސިއްހީ ކުއްލި ނުރައްކަލުގެ ހާލަތުވެސް ވަނީ އިއުލާން ކޮށްފައެވެ.