މީހުން ޓްރެފިކްކުރުން ހުއްޓުވުމުގެ ޤާނޫނަށް ގެނެސްފައިވާ އިސްލާހު ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު އިއްޔެ ތަސްދީގު ކުރައްވައިފިއެވެ.
މި އިސްލާހު ފާސްކުރީ މިމަހުގެ 18ވަނަ ދުވަހު ބޭއްވި ރައްޔިތުން މަޖިލީހުގެ ޖަލްސާގައެވެ. އެ އިސްލާހު ހުށަހަޅާފައި ވަނީ މީހުން ޓްރެފިކްކުރުން ހުއްޓުވުމުގެ ގާނޫނުގެ 60 ވަނަ މާއްދާގެ (ށ) އަށެވެ.
އެ ބިލުގެ 60 ވަނަ މާއްދާގެ (ށ)ގައި ވަނީ ޓެރެފިކް ކުރުމުގެ ކަންކަން ވިލަރެސްކުރާ ކޮމެޓީ އެކުލެވިގެންވާގޮތެވެ. އެގޮތުން މި މާއްދާގެ ދަށުން އުފައްދާ ކޮމިޓީ އެކުލެވިގެންވާނީ، އެކި ދާއިރާތަކުން ޢައްޔަންކުރެވޭ 10 (ދިހައެއް) މެންބަރުންގެ މައްޗަށްކަމަށް ބަޔާންކޮށް އެ ދިހަ ދާއިރާ މި އިސްލާހުގައި ހިމަނާފައިވެއެވެ. މި މާއްދާ އިސްލާހުކުރުމުގެ ކުރިން އެ މާއްދާގައި އޮންނަނީ މި ކޮމެޓީގައި ހިމެނޭނީ އެކި ދާއިރާތަކުން އައްޔަންކުރެވޭ 14 މެންބަރުންގެ މައްޗަށް ކަމާއި އެ 14 ދާއިރާ ހިމަނުއްވާފައެވެ.
ބިލު ތަސްދީގުވެ ގާނޫނަކަށްވާ ދުވަހުން ފެށިގެން އަމަލުކުރަން ފަށާގޮތަށް ފާސްކޮށްފައިވާ މި އިސްލާހުގައި ބުނާ (ޤާނޫނުގެ 60 ވަނަ މާއްދާގެ (ށ) ބަޔާންކުރާ) ކޮމެޓީ މި ގާނޫނު ތަސްދީގުވާ ދުވަހުން ފެށިގެން 10 ދުވަހުގެ ތެރޭގައި އެކުލަވާލަންވާނެކަމަށް އިސްލާހުގައި ބަޔާންކޮށްފައިވެއެވެ. އަދި އައު ކޮމެޓީ އެކުލަވާލެވެންދެން ކުރިން އޮތް ކޮމެޓީ ދެމި އޮންނާނެކަމަށްވެސް އިސްލާހުގައި ބަޔާންކޮށްފައިވެއެވެ.