Last Updated: November 28, 04:25
Thursday, November 28, 2024
ޚަބަރު

ޖާބިރު މަޖިލީހުގެ ޖަލްސާގައި ބައިވެރިވީ ބޮޑުމޮހޮރާގައި އިންނަވައިގެން!

ޖާބިރު ބޮޑުމޮހޮރާގައި އިންނަވައިގެން މަޖިލިސް ޖަލްސާގައި ބައިވެރިވަނީ: ފޮޓޯ / ޖާބިރު ޓްވީޓާ

ކޮވިޑް19 އާ ގުޅިގެން ރައްޔިތުން މަޖިލީހުގެ ޖަލްސާތައް ކުރިޔަށް ގެންގޮސްފައިވަނީ ވެބް ކޮންފަރެންސް މެދުވެރިކޮށެވެ. މެމްބަރުން ގޭގައި ތިއްބަވައިގެން މަޖިލީހުގެ ޖަލްސާއެއް މިއަދު އަލަށް ކުރިއަށް ގެންގޮސްފައިވާއިރު އެންމެ ތަފާތުކޮށް މިއަދުގެ ޖަލްސާގައި ވެސް އިންނެވީ ރައްޔިތުން މަޖިލީހުގެ ކާށިދޫ ދާއިރާގެ މެންބަރު އަބްދުﷲ ޖާބިރެވެ. އޭނާ އިންނެވީ ދާދިފަހުން ސަރުކާރުން އޭނާއަށް ހަވާލުކުރި ބޮޑުމޮހޮރާ ގޮނޑުދޮށުގައެވެ.

މަޖިލީހުގެ މިއަދުގެ ޖަލްސާގައި އޭނާ އިންނެވީ ބޮޑު މޮހޮރާގައި ކަމަށް ވިދާޅުވެ ޖާބިރު މިއަދު ކުރެއްވި ޓްވީޓުގައި ވިދާޅުވީ، ކޮވިޑް19 އިން ރައްކާތެރިވެ ގައިދުރުވެ ތިބުމަށްޓަކާ އޭނާ ހުންނެވީ ބޮޑުމޮހޮރާގައި ކަމަށެވެ. ޖަޒީރާވަންތަ ކޮންސެޕްޓަށް ރާއްޖެ ބަދަލުވާއިރު ލިބޭ ހިތްހަމަޖެހުމަކީ، 2020 ވަނަ އަހަރުގެ ފުރަތަމަ ދައުރުގެ 21 ވަނަ ޖަލްސާގައި ބޮޑުމޮހޮރާ ބީޗް އިން ޖަލްސާގައި ބައިވެރިވެ ވާހަކަ ދެއްކޭކަން ޖާބިރުގެ ޓްވީޓްގައި އޭނާ ވިދާޅުވިއެވެ.

ވ.ބޮޑުމޮހޮރާގައި ރިސޯޓެއް ހަދަން ޖާބިރަށް ހަވާލުކުރެއްވީ މިދިޔަ މަހުގެ 27ވަނަ ދުވަހުއެވެ. އެ ރިސޯޓު ހަދަން ހަވާލުކުރީ ޖާބިރުއާ އޭނާގެ އަނބިކަނބަލުން ދިޔާނާ ސައީދުގެ ހިއްސާ އޮންނަ މެރިން ޓެކްނޮލޮޖީއާއެވެ.

އެ ކުންފުންޏަށް 50 އަހަރަށް ބޮޑުމޮހޮރާ ދިނީ 36 މަސް ދުވަހުގެ ތެރޭގައި ރިސޯޓް ހަދާ ގޮތަށެވެ.

ރިސޯޓެއް ތަރައްގީ ކުރަން ޖާބިރު އަށް ބޮޑުމޮހޮރާ ދީފައިވަނީ 2012 ވަނަ އަހަރު ނަމަވެސް ކުރީ ސަރުކާރުން ވަނީ އެ ރަށް ޖާބިރުގެ އަތުން އަތުލާފައެވެ. ނަމަވެސް 2015 ވަނަ އަހަރުގެ ތެރޭގައި މެރިން ޓެކްނޮލަޖީ މޯލްޑިވްސް އާއި ބޮޑުމޮހޮރާ ހަވާލުކުރުމަށް ސިވިލް ކޯޓުން އެންގުމުން ވެސް ކުރީ ސަރުކާރުން ވަނީ އެއަށް އަމަލުކުރަން ދެކޮޅު ހަދާފައެވެ.